Ij n twala, ttuɣa din ij n yekfer ittɛic deg yij n tagant, maca ttuɣa lebda iɛezzel ixf-nnes, wer das-itteɛjib ad yirar aked imudar nniḍen.
Ij n twala, truḥ ɣer-s tedɣaɣat, tenna-s: “mi c-yuɣin ay ikfer lebda tekɛid, mayemmi tettɣimid weḥd-c, wer ki-neɣ tettirared?”
Yerra x-as yekfer s unixses: “Necc mendun kenniw, necc wer ḥmileɣ ixf-inu, ajɣul-a i ɣer-i x weɛrur, yessedqil-ayi, wer zmireɣ ad neḍweɣ, ad azzleɣ am kenniw.”
Tuḥel aki-s tedɣaɣat, uḥlen aki-s imudar nniḍen, maca walu! Amenni i yeqqim yekfer imell, yekɛa, wer yeḥmil ixf-nnes.
Ij n wass, yeḍra-dd x-as ad yekkes ajɣul-nni ḥuma ad yefses. Amenni nnit, yestef-dd ixf-nnes zeg wejɣul-nnes, inḍer-it deg yeɣzar, uca yebbeẓ-dd ɣer imudar ggur ittazzel, ineṭṭu s lefraḥet.
Qqimen deg-s imudar ttbeḥḍen, yenna-s yensi: “wer da ca di min txedmed ammu”.
Tayerẓiẓt ula d nettat, tɛeyyeb x-as min yegga, tenna-s: “ruḥ rzu x uceqquf-nnec, adef deg-s, aqa ad tendemmed”. Maca ikfer, min ɣer-s deg uzellif aqqa-t ɣer-s waha. Iɛejb-as lḥal, yufa ixf-nnes yefsus, ittqezqiz, ineṭṭu ssa ɣer diha di tagant.
Llilet llilet, uca a dd-tehwa tesmeḍ tettqessas, yeqqim yekfer itteḥtittiy, irezzu minzi ɣa idel ixf-nnes, maca walu. Yesber cwayt, yehwa-dd ɛawed wenẓar, ikemmel-as i min yeqqimen. Yedwel yekfer ittetter tsullet bla aḍil.
Tiwecca-nnes, teḍḍuqqeẓ-dd tfuyt ma d tafuyt! Yeqqim ɛawed yekfer irezzu ɣir mani ɣa yedduri, minzi ilem-nnes ikemmeḍ s leḥmu n tfuyt.
Yemsagar ɛawed ak tedɣaɣat, tenna-s: “merra manaya, zeg uceqquf-nni nnec i di tferrṭed, meɛlik i t-tejjid, ili lexxu aqqa-cek mliḥ”. Maca ikfer wer yeqbil, yenna-s: awey-itt deg yexf-nnem, necc lexxu fsuseɣ am cem, wer zmireɣ ad Dewleɣ ɣer deffar, min ggiɣ ggiɣ-t.
Yeffud yekfer s leḥmu i dd-yeḍḍuqqẓen, iruḥ ad isew zeg yeɣzar. Wami yiweḍ ɣer tma, yeẓra-t din wuccen. Wuḍan-as-dd ileyzazen, Iɛejb-as lḥal ad yeqqas aksum n yekfer i twalat tamezwarut, minzi qbel, ttuɣa ittadef deg wejɣul-nnes, wer ittif mamec das-ɣa yegg wuccen.
Iqerreb ɣer-s, alami ɛlayen a t-yaweḍ, yenḍew yekfer deg waman, yenjem zeg wuccen. Yeqqim ifetteḥ, ifetteḥ, alam das-dd-iban wejɣul-nnes yennuɣ deg yij n uzellif n bayelaman x tma n yeɣzar. Iruḥ ɣer-s, yudef deg-s, lexdenni yedwel ɣer imudar, yetter zeg-sen ssmaḥet. Derrɛen-as, uca bdan ttiraren akid-s.