D neccin nrezzu deg warcif n ijurnalen n Tmaziɣt iqdimen (Amaḍal Amaziɣ), newḍa deg ijjen wemsawal s lhimmet-nnes d ameqqran. Mani ttemsagaren tnayen n yiwdan i yebdan ungal s Trifiyt, nessawal da x Muḥemmed Caca, argaz amezwaru i yura ungal s Tmaziɣt n Arrif d Samira yelli-s idurar n Arrif; Tamɣart tamezwarut i yuran ungal ar yiḍ-a di Arrif. Amsawal-a ttwafsar di nnumru amenzu n "Amaḍal Amaziɣ" deg useggas n 2001.
Cenna malla tegga aked bnadem awal, akud i kid-s ggiɣ dag-s i tiweḍ aked uma-s. Awal akid-s x Tmaziɣt d yiles-nnes wer iqeṭṭi, wer ɣer-s asenti ula d ameggaru. Lexmi tessawal x wungal i tura, i d ɣa-yeffɣen deg wussan i d-igguren (iffeɣ-d di 2001 s tidett), wer cek-ittejji a zzay-s teffɣed.
1. Mayen cem-issiwḍen ad tarid ungal-a?
Wer ufiɣ bu ca n ḥajet nniḍen day-i ɣa-yejjen ad iniɣ mayen xseɣ ad ssiwḍeɣ. Rezzuɣ ad ariɣ x umezruy-inu, manaya wer t-ittfekki ḥa ungal, izli wer iqeṭṭi ca.
2. Mayen xef ittenneḍ wungal-a?
Yeqqseḥ bac ad ac-iniɣ, maci ɣar d icten, maca ad ggeɣ tizemmar bac ac-sfehmeɣ cwayt alami wer ɣer-neɣ bu wakud i zi dac-ɣa-ɛawdeɣ ungal amen yekmel. Ungal ittenneḍ xef ijjen tḥenjirt d tamarirt tlul deg ijjen tmurt zi tmura n midden, ɛemmers tammurt-nnes wer tt-teẓri, nettat d icten temɣart qqaren-as Hniya.
3. Mayen xef tettari?
Tettari xef yimxumbal n yiwdan, tesgenfa iyezzumen-nnsen, maca aked wakud tufa ixef-nnes tettaggʷej bezzaf x baba-s d tmurt-nnes, netta yettraja zzag-s aṭṭas n leḥwayej.
4. I mayen tt-yejjin ttuɣa wer tẓerr bu tmurt-nnes?
Ttuɣa ittawi-as-d Rebbi ila nettat zi tmurt-nni mani tlul, ma tammurt n baba-s wer ɣer-s akid-s walu.
5. I lexdenni lwalidin-nnes ttuɣa wer dag-s qqiren qaɛ ca?
Yemma-s wer tt-tessin qqaɛ, baba-s yuḥel mamec akid-s yegga, al ami yeqqḍeɛ layas, yebda ittegg tizemmar beɛda ad as-issidef amezruy n tmurt-nnes deg uzellif, xenni yiweḍ ɣer manaya.
6. Alaḥsab awal-nnem, tettban-d ila tarrggʷeḥ-d ɣer tmurt-nnes, malla wa d awal, mamec das-temsar al ami i d-tusa?
D baba-s, maca al ami yemmut, tessarrggʷeḥ-it-id nettat ḥima ad t-tenta. Minzi ttuɣa lebda ittwessa-tt mala yemmut a t-temḍel di tmurt mani i ilul.
7. Mamec tufa tammurt d lejdud-nnes?
Tufa min wer das-ittɣil a taf. Ttuɣa tettraja ad taca d tamennɛruqt. Ass ameggaru tettebheḍ al ami tufa ixef-nnes jar iɣallen n tmurt-nnes. Teṭṭef-it tiggʷedi ad as-terẓem. Ma lejdud ula d baba-s, wer yessin yemma-s, wer ɣer-s ḥedd.
8. Xef mayen xef i das-ittɛawad baba-s?
Ttuɣa ittɛawad-as xef ijjen temɣart wer telli ca am merra timɣarin. Tamɣart-a weḥḥed-s umi tɣennej tmurt aɣennij, ijjen uɣennij wer das-ifehhem ḥa wenni umi tudef tmurt d tmagit deg yixsan, wer tzemmred ad tt-tebḍid ijjen x wenneḍni.
9. I nettat tfehm-as?
Wer das-tefhim ca, minzi wer tiwiḍ ɣer lmustawa i tt ɣa yejjen ad as-tefhem.
10. Waxxa tettari wer das-tefhim?
Maci teqqim-it-id di tira. Teqqim-it-id di ca nniḍen, iyya ad igg bnadem tizemmar bac a x-as issiwel, a tt-isbeyyen, yettɣima yeqqseḥ bac a tt-issefhem, reḥwayej n buḥbel n yiman, s nnej i tzemmar n bnadem.
11. I mayen teɛna temɣart-a?
Tamɣart umi qqaren Hniya, teffeɣ-d d yemma-s n baba-s n tḥenjirt-nni umi qqaren Tamaziɣt.
12. Tenfeɛ ca tayyawt-nnes beɛda niɣ lla.
Tewc-as ijjen tcemmust dag-s tlata n tmeslayin, mkul icten ɣer-s lmeɛna-nnes, mayen ixes ad yini. Ixelxalen xsen ad inin addad anamun. Uzzal ixes ad yini amenɣi jar Imaziɣen d uḥewwas. Tiɣmas xsent ad inint laẓ.
13. Mayen ɣa tewweḍ Tamaziɣt?
Wer tt-tettfekki ḥa tmurt n bnadem mani i yilul, ma timura n midden wer ddumminet.
14. Mayen teɛna teslit n weẓru?
D ijjen umit (myth), tuɣa truḥ taslit ɣer ijjen ddcar qqaren-as ifri, deg webrid xeḍfen-tt laryaḥ, mexsen-tt tedwel d aẓru.