D ijjen usurif d asebḥan i yegga umari Arifi-Ahulandi Asis Aynan, umi ttuɣa yessek deg ijjen lweqt i yeɛdun i tɣiwant n Wamesterdam maḥend ad semman ijjen tluggut d tameẓẓyant s yisem n umari Arifi Muḥemmed Caca (1955-2016), zi senni taɣiwant n Wamesterdam terr-dd x-as wami ggin isem n Caca i tluggut-a di tendint mani isseɛda Caca azgen ameqqran n tudert-nnes.
Ismawen n izubaq d leqnaḍer deg Wamesterdam, merra ɛemmren, s uyenni wer qqiment ḥa tiluggutin-a timeẓẓyanin i ɛebbrent tɣezratin n waman zi teccuren tendint-a Tahulandiyt, d manaya i yejjin isem n Caca yugel ɣer icten zi tluggtin-a.
Yura Asis Aynan x lḥiḍ-nnes di facebook; d netta ifesser-dd fuṭu n tluggut « Chacha ttuɣa-t kunṭra i mamec mma tegga ca n tedyulujit, tadiktaturit d inni i das-irebbun txincit, ɛawed, argaz-a ila yella d ijjen bnadem d axsim ».
Shashnaq Shishunk, yegga ijjen waxefawal x manaya mani inna x lḥiḍ n Asis Aynan di Facebook manaya « D ijjen ḥajet d tasebḥant, am ddegg-a n tmeslayin timeẓẓyanin i yettjjan amaḍal-a yecna […] ».
Fuṭu-ya n tluggut, ibbeɣbeɣ di traccwin tnamunin, merra ttperṭajan tteswirt-a, mani ca zzag-sen sḥissifen wami ibilajen d tneddam n Arrif wer wwiḍen ad ggen imḍebbaren-nnes ismawen n imariten n Arrif x izubaq-nnsen, waxxa ttuɣa din timesmunin sekkent ɣer tɣiwanin maḥend ad semman ismawen n imariten Irifiyen deg izubaq d izuray maca ɣer iḍehcuren i ɣa-ssawalen.