25.1 C
Nador
Lḥed 23 Yunyu 2024

AMDH n Nnaḍur: Lpufa ittemnuza zzat i tmezgidawin-nneɣ !

Immel-d ijjen usiweḍ n tmesmunt tameɣrabit n izerfan n wefgan (AMDH), taseṭṭa-nnes n Nnaḍur ca n tmeslayin ssaggʷadent i yeqqnen ɣer durga n Lpufa deg ibilajen n Arrif.

Asiweḍ-a i d yeffɣen ass n 30 zi May, issken-d ula d iumkan mani i tettemnuza druga-ya taɛeffant, minzi teggur s tazzla jar imezdaɣ di Arrif, mani tettemnuza ula zzat i temzgidawin n tẓallit d tinni n tɣuri.

Amek tetter tamesmunt zi lmexzen maḥend ad issizeɣ taliwin n isebbaben i yettsebbaben di seḥḥet n yewdan.

Yettwassen ila Lpufa ijjen druga deɣa deɣya tesstebla inni i tt-isxeddamen, nettat d ijjen uxelleṭ jar ccayeṭ n kukayin d wamuniyak.

Yenna usiweḍ n AMDH ila “min ijjin druga-ya ad t-sxedmen xarebbi n yewdan, umi sneqsen di ttaman-nnes, tsekkʷar jar 40 d 60 derhem, isebbaben ḍfaren tabridt-a maḥend ad zzenzen aṭṭas, ad awḍen ula ɣer yenni i wer irebbḥen ca qbala”.

Ammas n umseksi kuntra i ttebliyyet i yellan di Nnaḍur yenna belli lɛadad n midden i yetteblan s druga-ya ittmernay.

Tiwacunin di Arrif nnuɣent di tarwa-nnsent i yewḍan deg uberyuḍ n ttebliyyet-a. AMDH, deg usiweḍ-nnes teydar-d aṭṭas n imukan mani tettmnuza lpufa ameknaw di Selwan (uggug n ijadarmiyen), jjihet n tɣiwant n Selwan, zzat i lkulij n lmasira di lwest n Nnaḍur, jjihet n furbu n Bni Nsar, zzat i tmezgida n Erreḥma di Ulad Buṭeyyeb…

Tesseqsa tamesmunt n AMDH tinbaḍin i yellan di Nnaḍur mamec temsar sgeɛɛdent ifassen-nnsent zzat i wefsar ameqqran n ddruga-ya ta. Mamec tetter zi Lɛamil n Nnaḍur ad yenhezz maḥend ad sbedden isebbaben-a, ad bedden deg wudem n druga-ya taɛeffant.

Timaynutin

Fser-itt