Lḥusima (Tifray)- Aḍfar n iseggusa n tzawa d laẓaɣ ula kṭer deg useggʷas-a wanita mani ɛad anẓar wer yekki aṭṭas deg idurar n Arrif. Mayen yejjin aman ttraḥen ttenqisen zeg uggug n Muḥemmed Ben Ɛebdelkrim Lxeṭṭabi i yudsen i Ayt Buɛeyyac.
Deg ussan-a i yeɛdan, wwḍen waman deg uggug-a ca n 20% zi mayen ikessi amen ikmel; min d-ittawin ca n 2.40 melyun n litru agasas. Nnumru-ya wanita wer ɣer-s yehwi aṭṭas zi mani.
Uggug-a wanita ikessi ca n 11.79 melyun n litru agasas xmi ittili nurmal, maca aṭṭas uya wer iɛemmer.
Uggug-a itticen aman ar Imesṭasen, Ayt Bufraḥ, Rrwaḍi, Snada d Biyya d jjwayeh-nnes, yeggur ad yegg imxumbal i imezdaɣ imukan-a yina. Ad neydar ila uggug n yeɣzar n Ɣis ɛad wer isili lebni-nnes.
Amek yettwassen, ila abeddel n uklima yejjar later-nnes d ameqqran x waman di Arrif.
Zeg ijjen uɣezdis-nneḍni, tḥesseb AMM (Tamurgant n tmura imunen) belli Lmuɣrib ittɛic ẓeyyar n waman. Mani wwḍen ass-a 500 mitru amekkuẓ i umezduɣ, mani di 1960 ila kul amezduɣ ɣer-s 2500 n imitrawen imekkuzen.
Ahekku-ya nzemmer a t-nefhem alaḥsab ijjen useggas ttuɣa dag-s inuẓar udrusen di 2015-2016, d weḍfar n iseggusa n laẓaɣ deg iseggusa imeggura.
Tamurgant n tmura imunen, tettwala belli Arrif zi jjwayeh i ɣa yeccen aɛmud zi ẓẓeyyar ittemsaren x waman.