Igeɛɛed nnumru n yenni i yelqef lehlak n Kuruna ɛawed, ula kṭer di tmura n Uruppa, ca zzag-sen ksin merra baqunat-nnsen. Manaya yejjin ca zi tmura Tiruppawyin ad beddent x baquna tis tlata kunṭra i ubirus-a wa.
Maca waxxa azgen ameqqran n inni i telqef Kuruna wer ggin ca baquna, maca Aliman iqqar belli ixess ca n midden ad ksin baquna tis tlata, ammu i d-inna ujurnal n Stuttgarter Zeitung.
Manaya zeɛma minzi baquna wer tettic ca n uḥeṭṭu ikmel zeg ubirus, min ɣa yejjin aṭṭas n inni i yeggin baquna a ten-ilqef lehlak-a, ɛawed « tiɣist » n baquna-ya tneqqes aked lweqt, alaḥab ajurnal-a lebda.
Maca melmi ɣa ksin iwdan baquna tis tlata ?
Alaḥsab tawzirt n seḥḥet Talimant, teqqar belli ar ɣa teɛda settchur zi tnayen n baqunat i ca n bnadem tili ɣer-s 12 iseggusa. Maca, mala teggid baquna, qbel i settchur, ataf wer ɣer-s bu ca n lfaydet d tameqqrant, minzi bnadem mala yegga tnayen n baqunat, ataf yeksi tizemmar n uḥeṭṭu zi lehlak-a.
Tawzirt n seḥḥet Talimant twessa bac ca n iwdan ad zzag-sen ssizzaren ad ggen baquna tis tlata awerni settchur n baquna. Ameknaw iwessura s nnej i sebɛin ɛam, d inni ɣa yella nnaqes di lmanaɛa d inni ixeddmen di spiṭarat d tsentutin ittsunen iwessura.
Lux, deg Uliman, wer tteggen bu bezzez x midden bac ad ggen baquna.
Maca qa tawriqt n baquna, ɣer Ilimaniyen tselleḥ aseggʷas ikmel i tnayen n baqunat waha. Ar lux, wer ssinen Ilimaniyen cḥal ɣa iqqim lḥal ammu, manaya zemmren ad t-ssnen deg wussan i d-igguren.