Yeqqim amulli n PSOE (iẓelmaḍen ispunya) d umulli anamur abask (PNV) d nitni i d-yewwin azgen ameqqran deg uvuṭi deg wass n lḥedd 21 abril s 39 n wesɣim x 75 n isɣimen. Maca EH-Bildu, aɣezdis asertan zi tmurgant n ETA yewwi 27 n imestiyen, s umquddu aked PNV, x uyenni i yegga ijjen tugurt ɣer zzat d tameqqrant.
Jjurnalat Ispunya qaɛ wer ssiwlen x tmerniwt n umulli anamir abask (PNV) i yeggin taḍa aked iẓelmaḍen, maca ssiwlent x Eh Bildu i yellan d amulli aẓelmaḍ i yettettren azarug i tmurt n bask, i yettwaḥsaben d ayyawen n ETA.
Amulli yewwi-d ca n 27 n wesɣim x 75 deg uberlaman anemnaḍ, ɣer-sen nnumru d ijjen aked PNV, i yellan d amulli i ttuɣa imenɛen tudert tasertant di tmurt n bask i di zeddɣen ca n 2 melyun n imezdaɣ.
EH Bildu yettwagg deg useggʷas n 2012, amɣar-nnes d Arnaldo Otegi, agmam aqdim n ETA. Ttahamen belli tamurgant-a ta tenɣa ca n 850 n yewdan wami ttuɣa tettemseksi aked Spanya. Maca zegga i tennefsi deg useggʷas n 2018, tebda EH Bildu tessreɣ tifawin x tudert tanamunt, tikulujit, tafiminist, ssersen azarug deg ucewwaḍ n tutriwin-nnsen. Ta d ijjen testratijit i yeṭṭfen amkan-nnes jer tisatalin i wer yeẓrint ca imenɣan n ETA.
Maca amezruy n tmurt n Bask ɛad ittemrusa-d. Amulli-ya ugin ma ad ḥesben ETA d ijjen tmurgant tibersiggʷdet.
Di tmurt n Bask mala isertanen wer xsen ad ggen taḍa aked umulli-ya, ataf lḥukuma tabaskut teḥwaj setta n iberlamaniyen zi ca n imulliten-nniḍen.
Ifusiyen ispunya sskanan ɣer-sen belli “sscemlilen” ayyawen n ETA, manaya i ɣa immersen di Katalunya aked imeɣnas-nnes i ittettren azarug mani ɣa ggen istayen di 12 mayy i d-igguren.