Tira: Muḥemmed Ṭaybi
Deg iseggusa-ya imeggura, niɣ deg imezwura n lqern 21, tettedder tsekla tamaziɣt di Arif ij n tegrawla temɣar zi qaε iɣezdisa. Uṭṭunen n usneflul aseklan, deg webrid ɣer tirew.
Manaya ireẓẓem tawwurt i tɣuriwin timesdawin, minzi tarezzut tamassant x tsekla tamaziɣt teggur deg umuttey d usetrar, amuttey-a war izemmar ad yaweḍ mala udrusent twuriwin ulid deg wanaw udyiz ula deg wallas.
Iḍa nettwala aṭṭas n uεeyyeb x tebridin timaynutin n usneflul amiray amaziɣ, maca di tidet wa d udem n tudert d tnukra i tutlayt-nneɣ, ixess a zeg-s nessiley s tɣuri d usefsey amassan, ulid d amxumbel ad isti umaru lxezrat i ɣa isferzen asnulful-nnes aseklan, wer nzemmer a naf ijj n wesneflul d anaẓur d aseklan igma-dd bla tifadiwin-nni ittejjan amari ad yewc min ɣer-s yellan deg ugensu, wer t-yessufuɣ ɣir x tefray deg ijj n umnaḍ deg-s tilelli d telɣeɣ iswizan di tuska n yijj n twuri temqudda, tdeqqes zi qaε iɣezdisa.
Nefren-dd ijj n wamud n usefru arifi amaziɣ, azwel nnes « Amenzu » i yellan d taqessist deg weɛrur n wamud d ugensu-nnes, yeffeɣ-dd deg uyur n ɣuct zeg useggʷas n 2023/2973, d amenzu n umari imcewwar Muḥmmed UBALAK; memmi-s n Uεarwi, ilul deg useggʷas n 1974, d abuɣaw di jjihet n Rrbaṭ Sala, ujar i wesneflul-nnes deg iger n usefru, yesmun jer tira d llɣa n uzawan.
Zeg isefra n wezlawi Ubalak i yettwaɣennjen nettaf tiqessisin ; « D arebbi yaregben, Amaziɣ, Aseggʷas n 20, Nnaḍuṛ » s tmijja n unaẓuṛ Jawad Tanuti.
Yeεdu aṭṭas n twalatin deg uɣawas n arradyu « Awalen di lmizan » deg-s amnus n usnubec di tussna d tmagit Tamaziɣt .
Amud-a ibedd x usufeɣ-nnes tmesmunt n Tmazɣa i tussna d tyumi di temdint n uεarwi, nettaf deg useddal-nnes ijj n tewlaft n yijj n ufus yuɣa x-as lḥenni yeffeɣ-dd zi swadday; tawlaft-a s iḍewḍan n umessuneɣ Muḥmmd Taibi, s min nessen n inumak i yellan ɣer lḥenni deg wamun amaziɣ am « lbaraka » « tumert » « timmeyment », tzemmer ad tili tewlaft-a tettwenna xef uzwel n wamud Amenzu, minzi di tussna n Arif yettwagga lḥenni i min issentan d min illan d amenzu.
Ittwasiggez wamud ɣer Lanwar di Selwan-Nnaḍur, wer das-yettwasegged ca usenmarra minzi nettaf εad tiqesssisin ttwarint x weswir amiwan bla aweqqrer n ilugnen.
Netta azlawi UBALAK ɣer-s tɣuni temɣar aked tmurt-nnes d yiles-nnes arifi ; d manaya i nettaca di tqessisin-nnes ; ADWAL / TEMZI / AꜪARWI / NNADUR, ujar i manaya nettaf ijj n mezri war iqeṭṭi ɣer temẓi.
Yegrew-dd umari deg wamud -nnes amezwaru ijj n taffa deg-s 38 n tqessisin ififent, zeg yijj n tebridt n tira d tatrart, tefsus x umeɣri, iqqen jer umawal n tgama am : (adrar, Asemmiḍ, Alili, Itran) d taycitin am : ( agarrem, mezri, amnus…) ula tfilusuft d tussna d waṭṭas n yigran_nniḍen, maca azlawi wer yessexdem ca amawal-a s tebridt tuḍfirt tusridt, yegga ijj n tiɣit tejja asneflul-nnes ad yili d anefraz.
Nettaf deg umenzu min wer yellin deg isneflulen nniḍen ; xmi itteṭṭef asentel, ittqewwer-as-dd yesmuna-dd merra iɣezdisen-nnes s usegzel Kul ijj izemmer ad yaf iman-nnes di tira n wezlawi maca s tebratin deqlent, wer nettettu ula d tibridin issexdem msebḍant am umengal jer tewsar d temẓi deg yezli :
Man tudart i day-m ?
A lfall n unuri,
A tewsar n uxemmem
I di teɣley temẓi.
Nettaf tiqessisin merra deg-sent liqqi n ulwa bla ma a naca s tlit-nnes amen yegga di tqessist “Sdukkel afus-inu”
Ɣmey-dd deg wul-inu
D tanewwact n usitem
D aɣennij n unaruz
A t-ɣennjeɣ akid-m.
Ꜫawed di tqessist n “Anuri” nettaf allas niɣ aεawed d ulwa :
Tennuri wah tennuri
Tudert-nneɣ tennuri,
Nessummet ssber n wul
Negga mezri d taduli.
D tidet yeqseḥ ad nidar merra titiknikin i yettwasxedmen, maca ameɣri ad yessen tiɣit n umudi i yegga wezlawi i yezlan s taẓyuḍi-nni deg-sen ɣa iqas.
Xmi neqqar amud “Amenzu” nettaf yejja-t wezlawi deg wuswir n yimsisli ; amen i yettwanna.
Ittɣima wa d ijj n wemnus n wezlawi yeksi-t i umeɣri, yessehwen x-as tiɣri ḥuma ad ɣer-s afent abrid tebratin d tewlafin deg-s yessers , maca wer dd-yusi ad qqiment tira timaziɣin ugelent ɣer wemnus n umeɣri d weswir imsisli, manaya a tent-yejj lebda deg yijj n tqulart d tameẓẓyant, ixess ad nessenta waxxa asenti iwεar maca uɣil ad afent abrid-nsent ad awḍent tira n tmaziɣt ɣer iberraniyen, wer yettɣimi umerway jer imariten .
Deg umeggaru a nini isul unaruz yella, minzi ttmernin-dd imesneflulen d imaynuten deg yiger n usefru amiray amaziɣ. nessitim tala n wezlawi Muhmmed UBALAK ad teqqim lebda tettnessis-dd s isefra, issefrun tidet n wamun d tidet n taycitin d tidet n tudert , nettaca wamud n AMENZU s ca n tefras i ɣa yernin aẓli i tsekla d tsedlist tamaziɣt .