Le Rifain
Zegga i tefqed twacunt n Ɛednan mmi-s, tettwafsar tteswirt-nnes deg iraqen n wemsawaḍ anamun. Tugur s deɣya deɣya am tmessi deg ixecxac. wer das ibin later. Alami d aɛecci n wass n jjemɛa 11 cutanbir, i ḥerten ipulisen x yijjen ɣer-s 24 n iseggʷusa, deg-s i tt-ggin, belli yenɣa aḥenjir d ameẓyan zegga i das-yegga min wer yeḍbiɛen.
Ijjen ulaɣi yeffeɣ-dd zi ɣer ipulisen n Ayt Makada, yeqqar belli yiweḍ-asen-dd ucetki zeg yijjen twacunt ass n letnayen i yeɛdun, belli ijjen uḥenjir ɣer-s 11 n iseggʷusa iweḍḍer, wer ibin. Qbel i ɣa awḍen ɣer ifilan n temsart-a, i yellan d ijjen ɣezzu d ameqqran.
Tarezzut i ggin ipulisen awarn i umi ḍefren ca n usejjel n kamirat n ccariɛ, iwḍen ɣer yijjen uterras ɣer-s 24 n iseggʷusa. Iɣerr zeg uḥenjir-nni, yiwy-it ɣer taddart mani yekra, i wer yiggʷijen ca x tzeddiɣt n twacunt n Ɛednan. Yegga-s min wer yeḍbiɛen, waɛliha yiwy-as buḥbel. awarn-as, iruḥ yerra x-as cal bac ad yenfekk zi rrimet-nnes.
Ɣezzu-ya i yettwaggen di Ɛednan yerra-dd ɣer twengimt ɣezzu i yettwaggen di tḥenjirt Ixlas di Azlaf. D waṭṭas n iḥenjiren d imeẓẓyanen i iwyen x yiri-nsen lewḥuc d yisiḍen i yellan di tteswirt n yewdan.