Tira : Ḥmed Adɣirni
Maci amenni waha ad dd-yas ad yari Muḥemmed Sellam Mmuḥ Ameẓẓyan (ilul di Arrif, di teqbilt n Ayt Buxlef, immut di Hulanda, yemḍel di Arrif aseggʷas n 1995) ijjen udlis qqaren-as “tagelda n Nnkur deg yeẓẓelmeḍ n Lmuɣrib”; minzi adlis ixes ad issilleɣ axarres asertan i Arrif, ad zzag-s yedwel ḥuma ad iydar ijjen tgelda-nneɣni tizwar-as i “L’imara n Idrisiyen”.
Maci amenni waha, ɛawed ad dd-yas ad yari ijjen udlis wis tnayen qqaren-as “Iburɣwaṭiyen”, d ijjen udlis wis rebɛa s wezwel n “Lxeṭṭabi d argaz n ddewla”. Zeg izwal (titres) n idlisen, i d-immalen ijjen uplanu d asertan yulleɣ deg iẓuran-nnes, iwa qa wenni wer t-issinen d aqubbani, waxxa i ɣa yili yeggur luxa x tsertit n Idrisiyen di Arrif.
Muḥemmed Sellam Ameẓẓyan, ɛawed netta d amari i ttuɣa yeqqnen ɣer Muḥemmed Ben Ɛebdelkrim Lxeṭṭabi d unemzray-nnes amaddud, netta d anessixef n uɣewweɣ n Arrif 1958-1959.
Ḥma ad issen umeɣri, aqqa asɛesker n Arrif tebda yebda zeg wami lmexzen ijjen lḥakem, umi qqaren ajiniral ittwassnen Muḥemmed Belɛerbi, i yellan d ijjen lḥakem d aɛeskri d ameddan di twalat d icten di temdint-a, ɛad awal-nnes ttɛawaden-t iɛeskriyen-nni icerken di girra n 1958-1958, ttɛawaden min inna: “neɣ-t bnadem, iyaẓiḍen, kkerfset x Irifiyen d tarwa n tarwa-nnsen...”
Di beddu n wartikel-a ad nessiwel x ijjen ulugen (règle) d asertan, netta ila qa min ittemsaren ass-a di Arrif, deg useggʷas n 2017, wer nzemmer ad t-nefhem mɣer mala neɣra xemsa n isenfaren isertanen i yekkin x Arrif deg umezruy i d-yusin awerni i uḥewwes n waɛraben i Tmazɣa.
Amezwaru-nnsen: Tagelda n Nnkur i yettwaggen aseggʷas n 710 di tmurt n Temsaman ar 1019, qqaren-as tamurt n Temsaman (Xzaret ila Tamsaman d Tamesna deg wenṭaq kifkif)
Wis tnayen: Iburɣwaṭiyen, tettwagg ddewla-nnsen aseggʷas n 741 di Tamesna ar aseggʷas n 1058, qqaren-as ula d tamurt n Tamesna.
Wis tlata: L’imara n Idrisiyen zi 788 ar 974.
Wis rebɛa: tagduda n Arrif i yettwaggen zi 1921 ar 1926.
Wis xemsa: ddewla n Imeknasen di temdint n Taza jar 917 d 1071, tettakkʷaḍ ar ijjen uɣezdis zi Dzayer n luxa d ccerq n lmuɣrib amen yekmel.
Xemsa-ya n isenfranen d min d-yusin awern-as, ttwaḥsaben d iẓuran isertanen n min ittemsaren ass-a di Arrif, uca aqqa zeg ifayyuten i yemsaren deg yiger n ufurmasyu n iḥudriyen imeɣrabiyen, d merra iḥudriyen n Tmazɣa; wami wer qqiren ca x xemsa-ya n isenfaren min xef qqaren imrezzuten deg umezruy, maca s ijjen lxezrat d tadinit ca n marrat niɣ d tamexzanit, s uya wer din bu ijjen tussna d tamassant x Arrif d tɣuni-nnes aked temnaḍin-nniḍen n Tmazɣa, s min ittwassnen luxa s “Dzayer” d “Lmuɣrib”.
Tussna-ya i wer yellin minzi inni umi qqaren “ayyawen n Idrisyen” ṭṭfen amezruy d tussna, mamec ṭṭfen ula d leḥkam, senni xminni sɣaran i imeḥḍaren ila Lmuɣrib yalleh ɣer-s 12 n leqrun, mani Nnkur tizwar Idrisiyen s 88 n iseggusa, tsiɣa awerni i Idrissiyen s 45 n iseggusa.
Zi min d-nenna s nnej, nzemmer ad neẓẓey ila jjehd n iḥudriyen n unhezzi n Arrif, ninti d iḥudriyen n tsatalt tis tlata awerni i lmewt n Muḥemmed Ben Ɛebdelkrim Lxeṭṭabi, rebban-ten lwalidin-nnsen x weḥfaḍ n imenɣiten d imseksiten d usiwel s Tmaziɣt.
Wer din ca di deg umezruy n Sus d usammer d sseḥra n yeffus ameknaw xemsa-nni n tmura i d-neydar di Arrif d Tmesna, ula d Imrabḍen i ttuɣa yellan d tamurt imunen tamezwarut tban-d zi Cengiṭ, tessers ddsas n ijjen tempriṭurit d tameqqrant awrni i uḥewwes Aɛrab d wefsar n Lislam di tqebbal timaziɣin.
Lmexzen n Lmɣrib wer yeqqim ɣer-s wi izemmren ad yefhem i unhezzi n Arrif; minzi anhezzi-ya wanita d ijjen tumant d tamezruyant, wer izemmer ad as-yefhem ḥa wenn i yessawalen x yiman n lejdud i luluf n iseggusa, inni umi yessfa wul, d tɣuni aked tmurt d twacunin i iḥekrm ddewlat d tmura d tqebbal; d inni i ɣa yewcen awadem-nnes x min imsaren, maci ad qqnen ɣer uselmed amexzani waha, d aya yejjin ijjen zeg iqdimen n imcewwaren n ujellid, netta d Ɛebbas Ljirari, ad yini ila min ittemsaren di Arrif ijja-aneɣ “niweḍ ɣer ijjen webrid ɛlaḥal yeqqen” (amsawal aked jjurnal n ṣṣabaḥ, deg wass n 03/07/2017) xenni amecciwer-a yenna zeg uraq n lmexzen i yullɣen “Axmi lmuɣrib wer dag-s qqimen imussnawen-nnes”.
Da, nzemmer a nefhem abrid i ibelleɛn maḥend a naf ifessayen i imxumbal n lḥirak i ibdan ifesser mani mma, ass-a wer zemmren imussnawen n lmexzen ad fehmen ila Sellam Ameẓẓyan ɣer-s tarwa-nnes d yessi-s, inni yenɣa Ajiniral Muḥemmed Belɛerbi d ujiniral Lkettani d iɛeskriyen n lmxzen i ttuɣa ixedmen di Fransa d Spanya d inni icerken di girra n Arrif 1959-1958 ɣer-sen imekkusa ttemsarawen d buḥbel-nnsen yella mani mma di buḥbel n iḥudriyen ass-a, wer ten-ɣellben ayyawen d tayyawin n ikriminalen i d-tessdwel “tamladast tuɣellist” iman-nnsen.
Tala: Hespress.