Yeqqen yisem n umirar aliman Franz Beckenbauer di twengimt-nneɣ ɣer umarri. Manaya yekka-dd zeg yijjen tḥajit n yijjen wer iqecceɛ walu di tlimant, yexs ad yini “s cwayecway”, uca yeḍra-dd ɣer-s umirar Franz Beckenbauer, d wenni i ttuɣa yessen waha. Lexdenni yenna-s: Bikenbawer! Bekenbawer!
Deg ineggura-ya, yeqqen yisem-a n Beckenbauer ɣer Saɛid Abernus, i yellan d ijjen yetri di tira n umezgun. Amen ɣer-s isuraf qaden deg yiger n usefru ula deg usugur n iseddan n wemḥizwar deg utilibizyun.
Abernus, yeksi-dd isem-a yesxedmit deg yijjen tselselt n texrazin n ugarnez d tḍeḥḥakt di tracciwin n wemsawaḍ anamun. Ibidyuten-a n bikenbawer i yellan d iquḍaḍen, ttgarenzen x waṭṭas n min nettedder di tudert-nneɣ, hekkʷlen wenni i ten iḍeffren, ttejjan-t ad yekmez ula d netta mani ikemmez Bikenbawer, ad yegg afus x tḥebbuyt, s yijjen tebridt amen nniɣ n tḍeḥḥakt d uḍenneẓ d ugarnez…
D manaya i yejjin ccan n bikenbawer ad yali, a ɣer-s ilin aṭṭas n imeḍfar zi manis ma.
Maca min ttuɣa wer ittriji ḥedd; a dd-yas yijjen uḥudri ixeddem ula d netta deg yiger n tkumidit, qqaren-as Yassar, ad yegg ijjen umikrutrutwar di youtub, isemma-t s yisem d ijjen “Beckenbauer”. Manaya yejja Said Abernus yeffeɣ-dd s yijjen ubidyu d tabrat yessekka-tt i wa i umi qqaren Yasar, yeqqar-as deg-s belli min teggid ammu wer da ca. Minzi cekk mala ttuɣa-c d aḥudri teṭṭfed abrid-nnec deg yiger n tkumidit, aqa wer qqillten yismawen i ɣa tixḍared. Minzi amen yenna Abernus, wa d ijjen yisem yixḍar-it awarn-i umi imarret aṭṭas x lxedmet i ittegg s yisem-a.
Abernus yenna ɛawed belli Yasar ittxessa-t ad yetter awadem x min yegga ammu. Yasar deg Umikruṭruṭwar-nni, wer yukir isem n Beckenbauer waha, maca yuker ula d axarres d tiqnitin i yessexdam Ghassan i yeggin isuraf deg umikruṭruṭwar-nnes, s useqsi-nnes i ittegg i yewdan x ca n tmeslayin ittejja-ten ad mxerwaḍen di temrarutin-nsen.
Yasar deg umikruṭruṭwar-nnes amaynu, wer dd-yiwi walu zi ɣer-s. Yeksi-dd isem zi Saɛid Abernus, yeksi-dd anḍaw d tebridin titiqnitin zi Ghassan. Manaya ittejja iwdan ad ssersen tamatart n useqsi x Yasar-a i yellan d ijjen wudem yuli-dd zeg utilibizyun n Lmeɣrib, sɣelyen-aneɣ zeg-s taḥrirt di aremḍan alami nuḥel.
