Dewlen-dd itran n sini d inni ittfabrikan ifilmawen zegga ttyarita ɣer tapi azeggaɣ deg ij n ficta wer terwis di tenniḍen. Alaḥsab lehlak n Kuruna, ḥuma ad ttwabḍant tisemɣurin n Wuskar waxxa Kuruna ɛad tella.
Amek i dd-smuttyen lexburat, yewwi-dd ufilem n « Nomadland » tasemɣurt n wuskar n ufilem i yifen. Akid-s tiwwi tamessufeɣt-nnes Chloé Zhao wuskar n temssufeɣt i yifen. Akid-sen tiwwi-dd Frances McDormand tasemɣurt n wuksar n tsegbart (actrice) i yifen, alaḥsab tiraret-nnes deg ufilem-a.
Asegbar yettwassnen Anthony Hopkins yewwi-d uskar x tiraret-nnes deg ufilem « The Father ». Mamec i d-iwwi Daniel Kaluuya tasemɣurt n wuskar n usegbar amawas i yifen x ufilem n « judas and the black messiah ».
Akid-s, yewwi-dd ufilem n « The Father » i yirar Anthnoy Hopkins d Olivia Colman, tasemɣurt n usinaryu i dd-immeksin. Mamec i d-yewwya umssufeɣ Adenmarki Thomas Vinterberg tasemɣurt n ufilem aberrani asebḥan alaḥsab afilem-nnes « Drunk ». Rni x-as tewwi-dd Yoon Yeo-jeong tasemɣurt n tsegbart tamawast di tiraret-nnes deg ufilem n « Minari ».
Ficta n wuskar teɛḍel ca n tnayen n wayyuren s lehlak n Kuruna, di ficta-ya tanita, inewjiwen ttuɣa mlaggʷajen jar-asen. Mamec ca zzag-sen ggin tikmamin, ggin tistat maḥend ad ḥḍan tizemmar n imeccarkuten. Ca zzag-sen, nnan aqqa manaya wer t-nnumen ca, maca waxxa amenni ɣer-sen mezri ad cerken .
