Imussnawen Iṭaliyen ufin ca n later n ijjen tnayen n yiwdan mmuten ca n 2000 useggʷas zeg wami.
Awerni ijjen uburkan i yemsaren deg Iṭaliya. Aburkan-a ireddjen tamdint n Pompiyi Taṭaliyant. Tnayen-nni n yiwdan i yufin, ijjen zzag-sen ɣer-s amkan yuɛla deg wamun Aṭalyan. Wenniḍen ittban axmi d axeddam niɣ d ismeɣ. D aya ig inna ijjen zeg imḍebbren n wurti n Pompiyi arkyuluji. Inna Massimo Osanna, anemhal (directeur) n tebḥirt-nni tarkyulujit : « Ittban-d axmi ttuɣa rezzun x ca n wemkan mani ɣa nnuffren zeg uburkan-nni, uca nnuryen da ».
Adrar n Mismu ttuɣa yeẓra ijjen uburkan deg iseggʷas n 79. Tamdint n Pompiyi amen tekmel teɣḍes adu leɛjaj n uburkan-nni mani ɣa jerrsen imezdaɣ-nnes s mamec i ten-ttuɣa qbel ad yemsar uburkan. Manaya ig ijjin asit-a d ijjen uraq yeccur s igelwan irkyulujiyen i imussnawen. Twafit-a i yeggin imussnawen, ttuɣa-tt d ijjen trezzut ggin-tt deg ijjen lvilla i yellan di lefyafi n temdint. Imḍebbaren n tmeɣziwt-a nnan belli argaz-nni bu igelwan i yufin ad yili ɣer-s di buḥbel-nnes jar 30 d 40 iseggusa. Mamec ufin ijjen mufalda n taḍuft ttuɣa-tt x yiri-nnes. Argaz-nni nniḍen, ttuɣa ɣer-s jar 18 d 23 iseggusa.
Imussnawen nnan belli ismeɣ-nni ufin yerreẓ-as weɛrur, manaya ixes ad yini ila qa ttuɣa ittegg ca n lexdayem qesḥent x-as. Osanna yenna ɛawed : « aqqa anuri n yiwdan-a ad yili s leḥmu ameqqran n uburkan. D aya i d-ittbanen deg iḍaren-nnsen d ifassen-nnsen ifeḍlen s leḥmu ». Tamdint n Pompiyi i yellan ṭṭerf i Napoli, ɛad qa tteggen dag-s tirezzutin maḥend ad tekkes tduli x igelwan-nnes, maca lux imsariyen wer zemmren ad ɣer-s adfen s lesbab n kuruna.