Teffeɣ-dd tmunt tameɣrabiyt n tmesmunin n ḥeṭṭu n yinni ittɣasṭaren di Lmeɣrib (UMAC) s yij usemmal, tesṭenṭen deg-s aneyna n lxaṭar x ttaman n waṭṭas n leḥwayej n macca i yulyen ar tqiccit, terɣa deg-s tmessi.
Tenna tmunt n tmesmunin UMAC deg usemmal-nnes, aqa sɣeflen iwdan deg yestayen (lintixabat), di llṭa i di rtutant twacunin timeɣrabiyin s lebbla n kuruna, rnin di ttaman n waṭṭas n maccat i itteḥdaja uterras ameɣrabi a dd-temmers x missa-nnes kul ass. ittemsar uya amen ttmuɣẓulent twacunin aked ẓẓelḍ d ca wer yelli, amen wer zmiren ula ad afen minzi ɣa ggen asefsi (tteḥlil), mani ɛad d minzi ɣa adfen ɣer klinikat i iɛerran x teɣmas, ttekksent tilmect i imehlak di ttaman, arendad i spiṭarat n lmexzen i wer ittqiddin i merra imehlak, d luksijin i idewlen yemmerni ttaman-nnes kter zeg wezgen.
Merra manaya, -yeqqar usemmal- wer yecfiɛ i ilubiyen n tsebbabt, wer yessenhezz qeɛ lḥukuma d ikabaren (l’aḥzab) i deg-s, rrin-dd s weɛrur i min ggin ilubiyen i yeṭṭfen tasebbabt n leḥwayej n macca, i yernin deg waṭṭas n leḥwayej, am leɛdes, ttuɣa isekkʷa 15 duru s jjemlet, yuley ar 26 duru s jjemlet. zzit, ttuɣa tsekkʷa 20 duru i lyeṭru s jjemlet, lexxu tedwel s 32 duru, ɛad qqaren aqa ad trenni duru kul ssimanet ɛla ḥsab min dd-yusin deg usemmal. Ssmin zi 12 duru i kilu s jjemlet, ar 16 duru. Ibawen zi 16 duru i kilu ar 20 duru s jjemlet. aren n finu, yuley zi 165 dh i txancet n 25 kg, ar 185 dh s jjemlet, qqaren ɛad aqa a deg-s rnin 15 dh di ssimanat i dd-ittasen. maqarun, temmuttey zi 16 duru i kilu s jjemlet, ar 24 duru i kilu…
Tamunt n tmesmunin UMAC, teṭṭef x uzellif, tena aqa manaya d lmunker, ittxessa zeg ikabaren ad inin awal-nsen, a dd-ffɣen s isemmalen d ilaɣiten i ɣa yesxesyen timessi i yekkren di ttaman n macca, arendad i ẓẓelḍ d ca wer yelli i di ttɛicent waṭṭas n twacunin n Lmeɣrib. Tetter zi Lḥukuma ad tesbedd manaya di min das-yeqqimen n wussan ssa d usawen.
