Deg wass n 06 yennayer n 2024, yeggur ad tegg tamesmunt n taddart n Arrif tameɣra n useggʷas amaynu. Amelqi-ya iggur ad dag-s cerken Lina Charif d tseḍma n Wagřaf d DJ Ftoch.
Zeg uɣezdis-nnes tenna tamesmunt n taddart n Arrif ila “tettegg tizemmar ḥuma ad tegg lefraḥ n useggʷas amaynu danita gi Biljik”. Mani twalat-a tanita iggur ad ggen amsagar-a wanita di Antwerpen “ḥima Irifiyen merra mani mma llan ataf ɣer-sen tizemmar ula d netnin akid-neɣ ḥeḍren, s manaya a nessiɣ fus i tmesmunt n Deroma VZW gi Antwerpen ḥuma akid-neɣ swizan gi lfereḥ-a wanita.” D aya i tenna lebda tamesmunt n Taddart n Arrif x tafart-nnes di Facebook.
Taseḍma n Agřaf iggur ad tili di Biljik di twalat tamezwarut, mani i ɣa tili ijjen tnaẓurt d Tabeljikit umi qqaren DJ Ftoch, i yesmunan jar tmuzikt n umaḍal d iɣennijen Irifiyen, aked tnaẓurt Lina Charif i ɣa isqasen agdud i ɣa iḥeḍren s iɣennijen-nnes i d-ittagmen zeg yezlan n Arrif.