Tettwassen tamurt n Ssaɛudiya s upiṭrul. Zzag-s tegga aṭṭas n igelwan i tserref bac ad tefser Tawehhabit deg umaḍal, tameggarut-a d ijjen tebridt d lislam teqqen x ixef-nnes, teffeɣ x waṭṭas n yewdan d tmura.
Maca zegga ttyarita tebda Ssaɛudiya tettnurẓum s cwaytcwayt, waxxa ittemsar ɛad lux ijjen ttaɛeddu d ameqqran s tseqdar n yewdan.
Anurẓem-a zeg wudmawen-nnes umi tegga ijjen wemsagar n tmuzikt talikṭrunit qqaren-as MDL BEAST, usin-d ɣer-s kṭer zi 700 alef n yewdan.
Amek ittwassen ila Ssaɛudiya amenɛad i tekkes fus-nnes x tmuzikt d ccḍiḥ minzi ila memnuɛ di tmurt-a.
Imeɣnaj zeg umaḍal amen ikmel cerken deg wemsagar-a, zzag-sen itri Afransis David Guetta, waxxa aṭṭas ugin a ɣer-s d-rezfen minzi tzemmem Ssaɛudiya ijjen ddusi d aɛeffan deg uweqqar n tseqqar n wemdan.
Amsagar-a ig ikemmlen ass n lḥedd i yeɛdan, yus-d zegga iẓerr umaḍal ijjen tesfift d tameqqrant n Umikrun.
Manaya waxxa tzemmem Ssaɛudiya aṭṭas n imettinen, mani ca n 8860 n midden i yemmuten s kuruna.
732 alef n yewdan Isaɛudiyen i d-yusin ḥeḍren deg wemsagar-a, min xef inna Tturki Al Ccix belli netta « ijjen zeg wuraren imuzikiyen imeqqranen deg umaḍal ».
Urar-a ttasen-d ɣer-s iḥudriyen d tḥudriyin, mani semmḥen-asen ad mxellaṭen, ad ceḍḥen jar-asen x wanya n tmuzikt tamaḍlant.
Ijjen temɣart d Tasaɛudit tenna i France Presse « ɛemmers wer neẓri amya di Rriyyaḍ, ahimun n midden, tamuzikt, arruḍ wer kid-s nennum ca ».
Afadi n tmuzikt
Zegga iṭṭef leḥkam Muḥemmed Ben Selman aseggas n 2017, igga aṭṭas n weɛdal.
Zi min yeɛdel, ijja timɣarin ad nedhent ṭṭumubil ad ggen ficṭat n tmuzikt temxellaṭ.
Timesmunin n tseqqar n wemdan qqarent ila Ssaɛudiya tesxeddam ddegg-a n wuraren n tussna bac ad tdel x ddussi-nnes aɛeffan deg yiger n tseqqar n wemdan, zegga nɣin asuḥufi Asaɛudi Jamal Xacugji aseggas n 2018.
Human Rights Watch (HRW) ttuɣa tenna ila Ssaɛudiya tesxeddam ddegg-a n wuraren « bac ad tesmeyyek lxezrat x ttaɛeddu ameqqran ittwaggen x tseqqar n yewdan ».
HRW tegga ij n usiweḍ-nneḍnit tenna dag-s aqqa « imeccarkuten d inni i ten-ittcejjaɛen ixess ad sxedmen mikrufunat-nnes d ubani-nnsen x ttlibizyi bac ad ssiwlen x tseqqar n yewdan min xef ttɛeddan di Ssaɛudiya, ad agin x wecrak-nnsen deg wuraren maḥend ad ccemleln tasna n Ssaɛudiya ».
Ijjen tḥudrit d Tasaɛudit tenna belli am ddegg-a n wuraren d isebḥanen ḥuma ad wcen aṭṭas n tlelli i iḥudriyen.
Terni « neccin neffud i tmzuikt d ifilmawen d tḍeḥḥakt d iɣawasen ɣer berra i taddart, axmi yalleh mamec nrezzu a nessen tamurt-nneɣ, manaya ittejja-aneɣ nefreḥ ».
Ssaɛudiya trezzu luxa ad tbedd x taliwin nniḍen n ikunumi-nnes ameknaw asari d arryaḍa.
Waxxa amenni ttwaẓren ca n ividyuten n ca n iḥudriyen ttẓellalen x twetmin, ca n Isaɛudiyyen tettren bac ad yili uweqqer i tseqqar n temɣarin kṭer.
Icten tenna, aqqa leḥkam Asaɛudi ittadef-d mala yufa ca n icten d taberranit min xef ttẓellalen, ma timɣarin Tisaɛudiyin qaɛ wer ɣer-sent ula d ijjen wudem n uḥeṭṭu.