26.1 C
Nador
Lexmis 30 Mayyu 2024

Min tessnem x tkurt n tmessi i d-ihwan x ucal n Ayt Wkil (Nnaḍur)?

Yeẓra  usinag n tfizikt astrunumi deg wandalus (Instituto de Astrofisica de Andalucia « IAA-CSIC ») ass n ssebt 19 zi tɣuct i yeɛdan, ijjen « tkurt n tmessi deg ujenna n Arrif, ttɣilen ila d akentar n usfeḍ i d-ihwan zeg ujenna ».

Ca n isiten iliktruniyen d Ispuniya nnan ila « imussnawen n usinag-a aspanyu ttwalan ila akentar-a iḍfar i ca n lkawkab. Ittwareddej zegga i yudef ajenna n tmurt s ijjen tazzla d tameqqrant qbel ma ad yefruri, ad yenqaḍa x luɛla n 31 alef kilumiter x Arrif. »

Taliwin-a s ixef-nnsent nnant ila « aya zelmen-tt deg usenfar n ‘Smart’, min xef ibedd usinag-a i d-neydar. Arrayes n usinag-a netta d José Maria Madiedo i yennan ila takurt-a n tmessi zelmen-tt deg ijjen wakud iɛeḍlen zeg wass n ssebt. »

Irni inna Madiedo ila « tazzla n ukentar-a n ujenna tiwweḍ 61 klm di tseɛɛet. Tegga ijjen uceɛceɛ n tmessi ijehden x luɛla n 97 alef km x ddcar n « Ibuḥjaren ». Qbel ma ad yefruri awerni tebridt-nnes ihwan s 31 km s nnej i Ayt Wkil.

Aked manaya tefser « tracca n tkurin n tmessi d isefḍawen deg yeffus n uɣelluy n Uruppa (SWEMN Network) x tarya-nnes di Youtube ijjen uvidyu i d-immalen « akud umi ẓrin akentar-nni n usfeḍ n tmessi, i d-isseknen ijjen uceɛceɛ d acemlal iqeḍɛen zegga i yewḍa, qbel ataf ad wer tt-nettwili qaɛ. »

Takurt n tmessi i d-ihwan x ucal n Ayt Wkil.

Tala-ya s ixef-nnes temmel-d ila « akentar iṭṭef amnad n Arrif zegga i yewḍa. Qbel ma ad yefruri x ibeḥrar n Nnaḍur, deg Ayt Wkil nican ». Ɛawed sseplikan ila « aceɛceɛ-nni i d-yemmeḍhren ttuɣa yettbana s waṭṭas i imezdaɣ n yeffus n Spanya. »

Xeddmen ca n iparatuten deg usenfar n « Smart » ḥuma ad ssegmen zi tracca n « tkurin d isefḍawen deg yeffus n uɣelluy n Uruppa (SWEMN Network). « Ḥma ad ḥḍan isefḍawen n ujenna lebda, bac ad zemmemn, ad ɣren mamec ttbeddalen ikenatren n usistim n tfukt xef uɣlaf n ujenna n tmurt ».

Timaynutin

C.Andic
C.Andic
Chahid Andich

Fser-itt