Yura-tt: Mimun Amsebrid
Amaziɣ d ijj n udrar
Zeg idurar n Arrif :
Iḍaren g waman
Azellif g ujenna,
Tiɣarḍin iriwint
Iri-nnes d azegrar,
Iɣezdisen qquren
Ifadden d imeɣta,
Udem-nnes di tfuct
Tili ur xaf-s ca.
Amaziɣ d ijj n udrar
Di tmurt-nnes iwta,
Ur issin amuṭṭi
Ur itteggwed, ur ittider,
Mala issuḍ-d usemmiḍ
Ur zzig-s ittiwi ca,
Itticc-as idmaren-nnes
Ittarra-t mays d-yusa,
Ur ittader, ur ixennes
Ur iddikkwil ɣer deffer.
Iẓẓifen n Umaziɣ zeg inehhimen n wajjaj,
Awalen n Umaziɣ zeg waḍu g ifran :
Smi nni issawal, d tamurt i issawalen !
Ils-nnes ur imsebḍi
Ancucen ur ttnedlifen,
Awal-nnes ifra,
Ur inniḍ, ur yerriẓ,
Itteffeɣ-d zeg idmaren yareqqen s tudert.
S warcti n tidet ittwaggw wawal-nnes, –
S untun n arrimet ttinbiyen wawalen :
Ttarẓigen niɣ ttiẓiḍen, maca ur ttemsisen.
Awalen n Umaziɣ ḍḍuqẓen-d zeg idmrawen
Amacnaw taliwin, amacnaw inessisen,
Ur llin d areṭṭal
Ur llin d imerwasen,
Usin-d zeg iḍennaṭ, –
Iḍennaṭ i yiggwjen,
Qqimen ttalyen-ṭṭaṛen jer tiziwin d iɣezran,
Jer ifran d izilalen
Jer imula d isummar.
S zig-sen i issiwel Btulimius d ufulay
S zig-sen i ismun Masin irgazen,
S zig-sen i mmenɣen
Tarwa-nnes d wayyawen,
S zig-sen i ukkwer Yugerten itumiyen,
S zig-sen i iberreḥ Ziri d Yeɣmurasen,
S zig-sen i tiẓẓif Tgellidt n Udrar :
“Mmtem xef tmurt-nwem, mala trim a teddarem!”
S zig-sen i ssiwlen igeldan
Aked ugdud n Imaziɣen, –
Ssilyen s zig-sen tigelditin,
Nnan : NECCIN SSA !
Ffɣen-d zi tmijja n Umɣar Muḥand Ameẓyan
G Wass n Temzyida, s tmulla ttudumen :
Wen ixsen ad idder, iffeɣ – ur xaf-s ca !
Wen ixsen ad immet d amjahed, ibedd-d da !
Ɣer Tsirt n Uɣbal, wami ismun tiqebbal,
S zig-sen i issiwel Mmis n Ɛebd Krim :
“kkrem ay iryazen a tewtem x ucal-nwem !
Ur telli d tudert, tudert s wadda-nsen !”
S zig-sen i isɣuy Muḥa u Ḥemmu aẓayan :
“kkrem ay imaziɣen, beddem x iḍaren-nwem!
Afransis ira ad yawi Lalla tamurt-nneɣ !”
S zig-sen i immuḍ izlan-nnes umedyaz,
S zig-sen i turja tḥenjirt aḥenjir,
Dig-sen i tessgem imma-s mmi-s ar d-imɣer,
Tegga s hellararu di tbambast n tejrest,
Tssekn-as ɣer ujenna itran d tziri :
“sst a mmi, sst a yelli
Baba-m ur da illi !
Iẓwa ajemmaḍ-in,
Ur ssineɣ min d ɣa yawi !”
S zig-sen i tettru temɣart aked tsirt,
G wul n tallest tettru, –
Tettru x uxxam-nnes :
Ay ul-inu a mmi
A wen meḍleɣ nnit,
Kseɣ aryam n wurɣ
Arriɣ din tawaryit,
Kseɣ aryam n wurɣ
Arriɣ din tawaryit !
D nitni d awalen imezwura i zi ssiwleɣ :
S zig-sen i rzuɣ x waman d wɣrum,
Dig-sen i yenndlef yiles-inu g umzwar
Lemdeɣ-ten akd umurdi d ticli d ubeddi,
Tessyem-yi imma x wanya-nsen,
Xaf-sen i tteṭṭṣeɣ, s zig-sen i ttekkreɣ
Jjin ur ɣileɣ nitni d awalen !
Ur xaf-sen sseqsiɣ, ur xaf-sen ssiwleɣ :
Man wenn ittseqsan x ufus-nnes niɣ d ḍaṛ ?!
Am tezwut n tudert
Di arrimet tettali-teṭṭaṛ :
Ur xaf-s bu wawal, maca s zig-s i nedder !
Maziɣ ahya Maziɣ !
Ay amɣar n Udrar !
Swiẓẓiḍeɣ-d ɣar-k : uca-yi-d fus-nnec !
Ittawi-yi wannay, tteggwdeɣ ad uḍiɣ,
Iqḍu-d ɣari wazir, qeḍwen-d imerẓa,
Tfawt texsi xaf-i, iweḍḍer-yi ubrid,
Di tallest steftufeɣ amacnaw aḍerɣal,
Ad rnuɣ ɣer zdat, niɣ ad dewleɣ ɣer deffir ?
Ɣar tfiqqit-nnec ttmurudeɣ d amurdi,
Tteggwdeɣ xaf-s a teɣli, tteggwdeɣ xaf-s a texsi,
Ad fesyeɣ di tallest, ad kseɣ ur ttiliɣ :
S wudm-nnec a Maziɣ i lliɣ, mala lliɣ !
Ṭṭef-d dayi a Maziɣ, ur yi-ttejja ad uḍiɣ !
Susf-yi g uqemmum ataɣ ad ggenfiɣ !
Ad iggenfa yiles
Ur ittɣimi ibḍa !
Ad s zig-s iniɣ awalen ddren, d imiẓiḍen,
A cekk s zig-sen iniɣ i yinni ur cekk issinen,
Ad asen-iniɣ : Maziɣ idder,
Ur illi wi t ɣa inɣen !
Mala ur t-tettwilim
D kenniw d iḍerɣalen !
Mala ur s-ttslim
Kenniw d iḍerḍuren !