1972 deg Umarikan, Eric Clapton d Jim Gordon s yisem n Derek and the Dominos, ɣennjen “Layla”, Aɣennij‑a n Rock yebna x tḥajit n wezlawi Afarsi, Nazimi, “Madjnun Laila”. Tḥajit‑a tettwassen la di taɛrabt, ɣennjen xa‑s aṭṭas n imeɣnaj s waṭṭas n tutlayin. Xelli ɛad la d afessel dag‑s, wi tet‑yiran d wi tet‑yebdan? d Aɛraben? d Ifarsiyyen? ma d Ikuridyyen? Mkul agdud zeg yina, d waṭṭas n yegduden nniḍen, aqqat ɣer‑sen, s yisem dwenni beɛda, Layla d ubuhali.
D ijjen tḥajit n tayri, n yijjen yetxess. S Farsi: Dastan Layla w madjnun, s Taɛrabt: Qays d Layla. Ifilmen, Amezgun, Tira, Izlan d Tmusiqt. Neccin a nbedd ɣer Tmusiqt.
Ttwalat tamzgarut i tudef Layla di Tmusiqt, deg useggʷas n 1908 x ufus n Ukumpunista Üzeyir Hacibəyov yellan zi Aderbidjan. Layla tebda tettban‑dd di tmusiqt di tmura n ccerq, di leɣnuj n Waɛraben, Imasriyyen, Ikurdiyyen, d ifarsiyyen. Awerni 1970 (Derek and the Dominos), deg 1988 Akumpunist aliman Detlev Glanert yexleqq‑dd tasimfunit‑nnes tamzgarut yegg‑as “Leyla und Medjnun”, yettwag‑as ijjen ccan yemɣer.
Deg 1992 Eric Clapton yɛawed iɣennej Layla s Akkustik, yessufeɣ‑it‑id zi Rock, ɣer tgitart ḥafi.
i Layla Tarifit? mant amkan‑nnes zi qqaɛ tinfas‑a n legnus ??
Aṭṭas n Layla yellan deg uɣennij Arifi. Maca ca n Layla dag‑s lefwaḥ n umaḍal, tcuni n umezruy, d tayri yesmujnunen, d llɣa ittawyen ɣer wussan n zik, wer ten‑nttif ɣer marra imeɣnaj irifiyyen.
Ufiɣ‑t deg uɣennij n Tifridjas, waxxa ca n yijjen ad dayi yini: wer dag‑s ca tḥajit n Layla d ubuhali, wenni itt‑itɣennjen wer ttirirar ca amen yirar Qayss ɣer waɛraben. Maca dag‑s aṭṭas n Arif, Arif n 2004.
terjiji tmurt, nhezzen wulawen
lebḥer ifewwer, hedmen yexxamen
tẓeddeɣ deg uqiḍun nɣan‑t isemmiḍen
tettraja tawmat tenni i tt‑ɣa‑yessaren
Di marra min ittemsern di Arif, tudrin heddment, iwdan mmuten, iqiḍan ttwaxelqen x tnayn ttwaratin, ha iyenni yemmuten, ha iyenni yeddren. Maca Artista yettwala Layla, yeksi s wemnus i nettat waha. Yella ca n umejnun ktar zi wa?
2021, Tifridjas iɛawed‑as iwɣennijen asufeɣ, yegga‑s ijjen bidyu clip yessufeɣ‑it Zakaria Bakkali, yecna s waṭṭas. S ucemlal d uberkan d tgitart. Twalat ɣer twalat, tẓarred deg ubidyu icten niɣ tnayn n tḥenjirin (Ḥayat Boya, Umayma Rifena), d tirifyyin s tidet. Ggint arruḍ d amaziɣ, tiggaz deg udem, d ucewwaf yeḍleq am tebriɣin n zik. Tiṭṭawin ccurent s umeṭṭa, yersa xa‑sent uzillez, udem‑nsent yesɣata. Tifridjas yerr‑dd buḥbel s ubidyu‑ya di Layla, Layla tarifiyt, d Layla Tamḍlant. D wemnus n temɣart deg umaḍal.