Asmaa Aouattah
Nessen ila izli ɣer-s amkan g wul d twengimt n waydud amaziɣ. Maca ḥetta ad yili d lesbab n lferz d ameqqarn, manya ur t-nenewwi ar ɣa nsell niɣ a nɣer tanfust n “Mezreɣ n ayetmas”.
Tanfust tamiwant tazikant d ijjten zi tmegga tidelsanin tiqdimin n waydud amaziɣ. Tsur ag tudert-ines. Ittreẓẓa zeg-s iɣnan n uzil, izggʷa zegs ar tmeddit.
Aydud amaziɣ zeg waydudn ur isxedmen bezzaf tira. D tasekla tamiwant i t-ifekken ḥuma ad yini awal-ines, ad yarxu g usɣun i uxarres-ines d uxayel-ines. Yufa g-s xelli d ammas ad issufeɣ takayin, ixemmimen d array x min das-innuqqren d min ittidir.
Tanfust tessḍaw ar imaḍalen iggʷjen, maca zi ɣa tessḍu ad tssers gi tudert n lebda. S uya, tessawaḍ-aneɣ-dd ineɣmisen x tudert taqburt n waydud amaziɣ. Min iqqar, muk ittidir, muk ittmuṣurruf. Muk ila igga wamun (société), muk ttwabnant tqebbal, iɣsan, ledcur, tiwacunin; muk ttilin wargaz d tmeɣrat g ummas n jjmaɛet, lɛewayed-nsen d tussna-nsen, lḥal (aklima), ilaxirih.
Bla manaya, zi twuriwin n tenfust ad tɛawen tarwa ad ẓwan zi temẓi ar temɣar (iniciation). Tesskan-asen timukrisin n tudert d min ixessa ad gen ḥuma ad ssegmen tirruggza.
Gi tenfust n “Merzreɣ n ayetmas” netnebhaḍ gi snat n tmeslayin
- Amkan n yezli
Tanfust tessawal x ijjt n temɣart tettijja-dd ɣir iwetman. Iwetman nni xmi ttraḥen ad furrjen, tazzlen-dd x-sen iwdan, qqaren-asen kenniw ur ɣer-kum da bu ultmat-kum i xkum dd-ɣa-yawin izlan. Iwetman-nni uguren zi ddcar-nni, telɛen.
Wami dd-tejja yemmatsen tawtemt, tafruxt-nni zi temɣar, ira ttexs ad tini izran ag teɛcirin-ines, ttqemmaḥen-tt, qqaren-as, mana ayetmam i ɣer-m da ad x-sen tawid izlan.
Manaya ur ten-ttxayal ad yili iḍa. D lmuḥal ma iɛqel-as ḥedd. Nessen illa taḥenjiret tarifit tettwaxḍar maci ɣir x zzin-ines d waddud-ines d lefɛayel-ines, tettwaxḍar xelli x yezlan. Mala tessen ad tawi izlan, tettwafraz x twetmin nneɣni. Merra ibliɣen ɛeccqen-tt. Tenni i yssnen i yezlan lebda rezzun x-s, lebda tɛizz. ɛlayen ataf tussna n yezlan d udem zeg wudmawen n tamgit n temɣart tarifit.
Maca ur neɛqil uzzlen x ci n ubliɣ zi ci n lfurjet mizi ur ɣer-s din bu wutlmas i x-s dd-ɣa-yawin izlan. Ula i ci n tebliɣt uzzlen x-s niɣ zawren-tt mizi ur ɣer-s bu ayetmas mixef dd-ɣa-tawi izlan. S ufella n manaya, nessen min ɛnan yezlan i temɣarin, ssnen-asent niɣ lla.
Manaya isskan-aneɣ ccan aqemqam i das-ittwawcen i yezli d tussna-ines. Tewweḍ jjmaɛet ad t-tegg d ssbab n usinef (catégorie de discrimination), ibeṭṭa iwdan x yekluṣa, ittijja tent ur ɛejjenen x tmurt d ijjten. Imusanwen d tmusawin n yesli ggurn jer n yewdan s yili d azegrar, aqa-ten mani mma. Inni d tinni ur issnen izlan, ttadfen deg ixef nsen, ttekken ssur ssur.
Imken d tanfust waha? Imken.
- Tilelli d tussemɣa.
Zi lebda nettesla ila aydud amaziɣ d aydud d ilelli. Ur ittidir i ḥedd. Ntteḥsab x-as illa netta ur issidir ḥedd. Manaya rid d tidet. Aydud amaziɣ, s umsebḍi jer n tmurt d tenneɣni, ira g-s ilelliyen d tlelliyin ur x-asen itteḥkim ḥedd. Maca ila g-s xelli d isemɣan, inni mix tteḥkamen ilelliyen.
Aydud atergi d ijjen zeg wayduen mig illa beṭṭu n yewdan x yekluṣa iban bezzaf. Maca mani ma gi Tmazɣa, nettaf ɛad illa wawal: akli niɣ ismeɣ. Amsebḍi jer n yewdan ira ibna x kulur n yilem, x umkan mays dd-yusa bndam, ma ɣer-s tammurt ma lla, man ssenɛet ig ixeddem, ilaxirih. Maca tadarjiwt tameggarut qqaɛ g yekluṣa ya d kulur, asesmeɣ n icemlalen i yeberkanen, waxxa maci lebda amya.
Tanfust-a n “Mezreɣ n ayetmas”, tekkes afrag mseqqem x manaya. Maca tesskan-it-id am ci n tmeslayt ur g-s bu lmuckil. Nurmal mizi aydud ammen ila ittidir.
Tamɣart i dd-ittijjan ɣir iwetman ɣer-s tismeɣt. Deg yijj n uqeṭṭus zi tenfust a nessen illa d taberkant, illa kulur aberkan ittwaḥsab d aɛeffan, d lesbab n usesmeɣ.
Wami turu temɣart nni tjji-dd tawtemt, tenna as i “tesmeɣt-ines” ad traḥ ad tssigel bandu d acemlal, nettat tegga t d azewwaɣ ḥuma ataf ur dd-trewwiḥen sebɛa nni n iwetman. Ur nessin ci maɣar i tegga ammen. Maca nzemmar ad nxemmem: ticen-as ccɣel bezzaf, neggin ar ɣer-s, ssanafen-tt?
Kulci ad yili. Maca tanfust tesbiyyan-aneɣ-dd “tismeɣt” d taɛeffant, ɣres ul d aɛeffan (am yilem ines).
Zi ssin d tsawent, a nẓar udmawen n wefraz nneɣni:
- Yellis n temɣart-nni tennay x uyis, tismeɣt teggur x iḍaren.
- Tella tala n ilelliyen, tella tala n isemɣan
- Awmaten nni ultmatsen ggin as ccan, “tismeɣt” ggin g-s min xsen: ccɣel, aɛmud, aseḥqar.
- “Tismeɣt” ittwaqess as ufus, imken nettat temmut.
Qqaɛ manaya gi tenfust ittban-dd d taɣdemt (la justice). Am ccɣel tusas-dd i “tesemɣt” qqaɛ min g-s ittwaggen wami tezɛem, trezzu ad tili am lallas tilellit. D aẓellaḍ (lɛiqab) i wenni niɣ tnni i ɣa yezwan igmiren i tssers jjmaɛt. D wa d alemmud ameqran n tenfust i tarwa i das itteslan.
Nessen illa tinfas d tina, ixessa ad twaɛawdent amuk llant. G wakud-nsent ila ssawaḍent tabrat-nsent. Sselmadent, ssgamant iwdan x usegged, ḥuma ḥedd ur issxlxal nniḍam i tebni jjmaɛet.
Maca iḍa, ulabudd ad nɣer tasekla, taqdimt d tenni n yiḍa, s ijjt n tiṭṭ tumen s umquddi jer n yewdan. A nettesla, a nssifif.