Asuɣel: Yassmina El Jouari isefra n Fernando Pessoa zeg udlis n " Le gardeur de troupeaux et les autres poèmes d’Alberto Caeiro avec Poésies d'Alvaro de Campos"
Lxezrat-inu timezdagin amecnaw tanewwact ulili.
Nnumeɣ ggureɣ deg iburad,
Xezzreɣ x ufusi d uẓelmaḍ,
Ula ɣer deffer ca n imuren…
Uca min ẓarreɣ mkul tazmezt
D ijj n ḥajet wer tt-ẓriɣ qbel,
Ssneɣ mamec i das ɣer uceɣ ixef-inu merra xminni i tt-ẓerreɣ.
Uca ttaciɣ s ubelleg-nni
I zi ittaca uḥenjir xminni i d-ixelleq,
Ttaciɣ belli xellqeɣ-d di mkul tazmezt
Deg umaḍal-a ittbeddalen lebda…
Ttamneɣ s umaḍal-a ameknaw mamec i ttamneɣ s tnewwact n ɣedjumrar,
Minzi ttwaliɣ-tt. Maca wer dag-s ttxarrseɣ ca
Minzi axarres wer yelli ca d tigzi…
Amaḍal yella maci ḥuma ad dag-s nxarres
(Ad txarrsed ixes ad yini belli thelked zi tiṭṭawin-nnec)
Amaḍal yella ḥuma ad dag-s nexzer
Uca a t-neksi mamec yella…
Wer ɣer-i ca tafilusuft : maca ɣer-i taycit…
Uca mala ssiwleɣ x tmust, maci
minzi ssneɣ-tt,
Maca minzi ttexseɣ-tt, uca zi minzi tt-ttexseɣ
Wenni ittexsen wer issin ca min ittxes,
Niɣ mayemmi i tt-ittxes, niɣ min ixes ad tini
tayri.
Tayri, d tamesla,
Uca tamesla, d maci d axarres
**
Mala rezzun ad ɣer-i yili ijjen tmistikit
Aqqa-tt ɣer-i.
Nec d amistiki, maca s arrimet-inu waha.
Minzi iman-inu ameẓẓyan, wer ittxarres.
Tamistikit-inu, aqqa-tt ɣer-i minzi wer xseɣ tussna.
Ad iliɣ, bla ad xarrseɣ di tudert.
Nec wer ssineɣ ca min teɛna tamust: maca ttɣennjeɣ-tt.
Ttiɛiceɣ x ijjen tsawent
Deg ijjen uxxam ibeyyeḍ s jjir
D aweḥdani,
Uca d wa i yellan d “nnec”.
**
Ass-a ɣriɣ tnayen n tewriqin
Zeg udlis n ijjen umedyaz d amistiki,
Uca ḍeḥkeɣ ijjen tḍeḥḥakt tegga am imeṭṭawen.
Imedyazen imistikiyen d ifilusufiten
helken,
Ifilusufiten, d irgazen d ibuhaliyen.
Minzi imedyazen imistikiyen qqaren belli tinewwacin ɣer-sent
taycit
Iẓra ɣer-sen iman
Iɣezran ttberraden s tfawt n tziri.
Maca tinewwacin, mala ttuɣa ɣer-sent taycit, wer ttilint ca
d tinewwacin,
Maca d iwdan ;
Uca mli iẓra ɣer-sen iman, ataf tili
Ddren ;
Imli iɣezran ttberraden s tfawt n tziri,
Tili dḥan d argazen helken.
Ixessa ad nettu min ɛnant tinewwacin, d iẓra,
d iɣezran,
Ḥuma ad nessiwel x taycit.
Wenni issawalen x iman n iẓra, d tinewwacin,
D iɣezran,
Issawal x ixef-nnes d uxarres-nnes
iferɣen.
Ad tqada-ac a Rebbi wami iẓra d iẓra waha
Iɣezran d iɣezran waha
Tinewwacin d tinewwacin.
Necc ttariɣ isefra-inu
Uca ferḥeɣ zzay-sen,
Minzi ssneɣ tamust
zi berra ;
Wer tt-ssneɣ ca zi ɣer daxel-nnes
Minzi tamust wer ɣer-s ca adaxel
Niɣ ataf wer telli ca d tamust.
**
« Azul, x-ak ay ameksa,
Yellan x tma n webrid,
Min dac-yeqqar usemmiḍ xminni ittsuḍa ? »
« Yeqqar-ayi belli netta d asemmiḍ, belli ittsuḍ,
Belli issuḍ qbel
Belli ad issuḍ ɛad.
I cekk, min dac-yeqqar ? »
« Yeqqar-ayi ktar zi degg-a s waṭṭas.
Yessawal-ayi x waṭṭas n tmeslayin-nneɣnit,
X min iruḥen, x uẓuyyet,
X tmeslayin-nneɣnit i wer llint ca. »
« Zixenta cekk wer teslid ɛemmers asemmiḍ yessuḍ.
Minzi asemmiḍ wer issiwil ɣir x usemmiḍ.
Min tettslid d axarriq waha,
Uca axarriq aqa-t day-k ɣer daxel.»
**
D uqrir
Mala neẓra tnayen n ticujjura ttawyent, zeg wayawya.
Beddent ict zati i tenneɣnit.
Ɣari, axarres d tira, d tnayen n tmeslayin n tmust, am ukulur n
tnewwact
Ɣir necc wer tteggeɣ ca ca n lxedmet tecna
Minzi wer ɣar-i ca tcuni n takucant
Necc rray-inu yehwen, necc lliɣ mamec i d-ttbaniɣ zi berra.
Necc xezzreɣ uca ttaciɣ.
Am mamec i d-tazzlen waman
zi tsawent
Acewwaf-inu d tamust am tnukkra n
waḍu.
**
Mala beddent tmeslayin, d wenni illan d lmewt.
Mala beddent i neccin
D wenni illan lmewt-nneɣ.
Xmi i ɣa temmet tacejjart-in, tameẓẓyant
Ad teksi akid-s ijj n cwayt zi tudert-inu.
Di marra min xemmeɣ jjiɣ day-s ijj n cwayt zzay-i,
Marra min ẓriɣ, uca iruḥ,
Iruḥ akid-s ijj n cwayt zzay-i.
Leɛqel-inu wer isemfraq ca jer min zriɣ d min ttuɣa lliɣ.
**
Immers-d ukulur amerɣiɣɣed x teynart-inu,
Yeṭṭes ucewwaf n uḥenjer-ni i weḍḍreɣ
Aqemmum-inu wer yeqqim isbeḥ i wsuden,
Mala ttuɣa ɛad tertexsed-ayi, xayellah s tayri-nni,
sbedd zzay-s.
Niɣ ad ayi-teɣdad ag ixf-inu.
**
Ttexseɣ tinewwacin n tebḥirt n Adonis
Wah, a Lidya, ttexseɣ tinewwacin-nni,
iɛeddun s unexḍaf.
Ittmettan deg ijj n was,
Zi minzi ɣer-s tfawt i lebda.
Xelleqent ɣer awerni i ma ad tgeɛɛed tfuct,
Ttmettant qbel ma ad ikemmel Apollo ufuɣ-nnes.
Ejj ad tili tudrrt-nneɣ ula d nettat, d ijj n wass waha,
Ejj-aneɣ ad nettu s neɛmada, A Lidya, belli tudert-nneɣ taquḍaḍt.
Itizzal-as llilet, iḍeffari-tt llilet.
**
Yefsus, yefsus, yefsus aṭṭas,
Ijj usemmiḍ yefsus aṭṭas yeɛdu
uca iruḥ, i lebda yefsus aṭṭas ;
wer sineɣ, necc, min ttxarraseɣ
Wer rezzuɣ ca ad t-ssneɣ.
**
Necc d ameksa.
Tḥimmart, d axarres-inu
Axarres-inu ma, d taycit.
Ttxarseɣ s tiṭṭawin d imejjan
S ifassen d iḍaren
S wenzar d uqemmum.
Axarres di tnewwact, ixes ad yini: ad tt-tẓred, ad tt-tcemmed
ad tecced ijj n lxuḍret, ixes ad yini: ad zzay-s tacid.
Zi minzi deg wass-nni iḥman
Ttaciɣ xeyqeɣ ad aciɣ aṭṭas,
Teẓeɣ x warbiɛ,
Teqqneɣ tiṭṭawin isḥarraqen,
Ttaciɣ belli arrimet-inu marra tezzer x tilawt,
Ssneɣ Tidett uca ferḥeɣ.