Le Rifain
Yegga umirar aseppanyu Iker Casillas llayhennik x tirart n čamma, ass n ttlata 4 zi ɣuct awarn i umi yiweḍ 39 n iseggʷusa di lɛumur-nnes.
Iker Casillas, yesseɛdu 20 n iseggʷusa di tirart n čamma, yekka aṭṭas aked n Real Madrid, d terfiqt n Seppanya i ked yiwi lkas n umaḍal aseggʷas n 2010.
Yegga umeḥḍay n tracca, Casillas, isuraf qaden aked terfiqt-nnes Real Madrid, i ked yebda tirart amen yella ɛad d aḥudri aseggʷas n 1999. Asit aliktruni n terfiqt-a yeqqar x-as “d netta i yellan d ameḥḍay asebḥan qeɛ deg umezruy n terfiqt”.Yirar akid-s 725n tfassin n čamma, ittas-dd wiss tnayen awarn i Raul i yiraren 741 n tfassin aked terfiqt n Real. Yiwi 19 n twalatin lkisan, zeg-sen tlata n Champions League d xemsa n twalatin n liga n Seppanya, d tnayen n twalatin lkas n Seppanya.
Gianluigi Buffon i yellan zeg imeḥḍayen imeqqranen n čamma, yefser di leḥsab-nnes di twiter ijjen tteswirt yemdurruɛ deg-s aked Casillas, yura sennej-nnes: “saḥḥit a Iker, bla cekk, ili ula d ijjen lḥajet ma ɣer-s lmeɛna”.
Sergio Ramos, ameddukkel-nnes di Real Madrid d terfiqt n Seppanya, yenna deg yijjen tzemmemt di twiter: “D čamma n uḍar i c-ittcekkaren ay ameddukkel, cekk d baryinti i lebda”.
Iker ttuɣa yexs ad irecceḥ ixf-nnes bac ad yedwel d arayes n tmunt n Seppanya n čamma n uḍar di febrayer i yeɛdun, maca uca yedwel yegga bnaqes di yunyu zegga i dd-iban lebbla-ya n kuruna di tmurt-nnes.
Din lexburat i yeqqaren aqa Casillas ad yeɛqeb ɣer Real Madrid, ad yeṭṭef amkan n yemcawer n arrayes-nnes Florentino Pérez.
euronews