Teqfer 120 n iseggusa zegga yemmut Friederich Nietzsche [tneṭṭeq: Fɣidɣic Nitcă]. Maca wer yeḥḍer i ccan das yettwaggen di ddunect. Ixarrisen‑nnes qayn ɛad sessawen iman n umaḍal ɣer assa!
“Nec urid d bnadem, nec d ddinamit“, Ammu yura Nietzsche di tbyugrafit‑nnes “Ecce Homo”. Wer yenni ɣir tidet, yessiɣ taftilt deg ixarrisen n zic n “Abendland” (Aliman). “Arebbi yemmut, d neccin i t‑yenɣin” ‑D ict zeg aṭṭas n tawalin, waxxa tqess. i zi yettwassen deg umezruy n tfulusufit.
Yeffeɣ‑dd ɣer tudert deg usegʷas n 1844 deg ijjen lkampu qqaren‑as “Röcken“, ilul deg ijjen taddart n glizya taprutistant. Awarn‑as yeɣra di Bonn x ddin, tatiyulujit tifangilit. Senni ibeddel ad iɣer “Old Philology” (Tussna n iles Alatini, Tagrikt taqdimt, d umezruy aseklan n Ugrik, d Arruman.). Yegga ijjen ubeddi di temdint n “Leipzig“, senni iraḥ ɣa “Basel”. Dinni terra tesdawit d aselmad n Tussna n tutlayt taklasikit, qbel ad yeqfel 25 n iseggusa. Maca taddut‑nnes wer tejji. Deg 1875 yesmaḥ di tesdawit, lesbab‑nnes d aṭṭan. Senni yemmutti ɣer tira, d Tfilasufut.
Aduqqez amzwaru yeggit s lektab‑nnes amzwaru “Die Geburt der Tragödie aus dem Geist der Musik” (1872) (Tlalit n uxeyyeq zeg iman n tmusiqt). Ttuɣa ɣer‑s 27 n iseggusa. Dinni yessemɣer aṭṭas zeg ufaylasuf Arthur Schopenhauer d ukumpunista Richard Wagner. Lami ttuɣa‑t di Leipzig, yemsagar akd Richard Wagner, yesbuhlyit weklasi ntmusiqt iteg.
Nietzsche yeqsaḥ deg Ukritik i ddin.
Di “tlalit n uxeyyeq” yessers‑dd cwayt n min immaren aɛeqqa n uxarres‑nnes. Di 100 n tefray, d 25 n izyegnan. Ifessel tiɣuriwin nnes x tussna tagrikit, tayri‑nnes i tmusiqt, Asemɣer zi Schopenhauer d d wudem ameḍlan n Wagner. Nietzsche yessers iwalen ullɣen x tikkest n ttiqet zeg Awalen d tira: “Nein, gerade Tatsachen gibt es nicht, nur Interpretationen.” [lla, Tidet wer telli, yella ufessel‑nnes waha.” Zi min yenna Nietzsche qa ssɣuran‑t assa di tesdawitin n umaḍal.
Artista n ddinamit, yekkes afray x tmasiḥit. Di tqiccit n Ukritik nettaf “Antichrist” (lmasiḥ ddejjal), mani Nietsche yemsaḥ inedrifen n tmura n lɣerb marra ɣer Tmasiḥitm d tatiyulujit. Inni itefhamen di Nietsche, ttwalan belli ixessa wer t‑ittwili ḥed d leɛdu n tmasiḥit, ttwalan belli ittemseḥsab akd tmasiḥit ḥima ad t‑isellek. Dwa d axarres yebnan xef dsas. amen i dyusa deg uzgen aneggar n yizwel n wedlis nnes yettwasnen s Aɣelluy n lasnam: “Götzen-Dämmerung ‑ Oder Wie man mit dem Hammer philosophiert.” (Aɣelluy n lasnam, niɣ mamc ɣa tegged Tafelsafit s tefḍist).
Aṭṭas n waṭṭan
Zmmern ad yili uxarres‑nnes yweɛren d wenni id ixelqen lehlakat n daxel d arrimt dag‑s ttuɣa? Afaylasuf Nitzsche kkin xaf‑s iseggusa wer dag‑sen yeẓri lehna zi ccqiqet. Leḥriq n stumaɣu, rrni xaf‑s qrib ataf yeddarɣel deg ineggura n wussan‑nnes.
Ar mani yesqad aṭṭas n tebratin, iwyent ɣer ijjen klinika n tnefsect di “Basel”, awarn‑as ɣa “Jena”, lami yewweḍ 45 iseggusa, ileqfit ijjen lehlac n tnefsit yejja‑t wer izemmer ad yexdem. Yesseɛda min yeqqimen zi tudert‑nnes tkellef zzag‑s yemma‑s, awarn‑as ultmas, uca yemmut ass n 25 Ɣuct 1900. x 55 n iseggusa.
Ccan‑nnes deg iseggusa n 1890, wer dasen yeḥḍer. Dinni yemmerni weḍbaɛ n min yura, mamek mmernin yewḍan yeqqarn min yura. Ultmas d nettat ikellfen zi min yura, minzi d nettat waha it‑iwerten. Di tidet, cwayt lami wer watessin, cwayt s ɛemden, tessufeɣd ijjen tebridt waha n tira n uma‑s. Dinni i tessen tsekla tikkest n tqcurt tadelsant n Nietzsche. Tewca ccan i wedlis “Also Sprach Zarathustra” (Amya yessiwel Zaradact). Awarn‑as swiẓẓḍen inaziyen d ifacisten, Mussolini … ɣer iwalen n Nietzsche am “Herrenmensch” (Bnadem sid‑s), d “Wille zur macht” (ad texsed ad tḥekmed). Awarni amquṭṭes n inaziyyen, ttuɣa yettwaḥsab Nietzsche iwessex
Ccan Ameḍlan n imettan
Ttuɣa din ca n Ifilasufen deg Utalyan d Fransa, i yewcin werha i Nietzsche, Am “Jean‑Paul Sartre” d “Albert Camus”. Ɛad usin‑dd wussan swiẓẓḍen ɣer‑s imxarrsen am Jacques Derrida d “Gilles Deleuze”. “Im Bergwerk dieses Denkers ist jedes Metall zu finden” Giorgio Colli (1917-1979). (addrar yebna umxarras‑a, dag‑s mkul aklasi n lmeɛden)
Di min ɣa ysel wenni yeddren deg uliman x iressawen zi min yeqnen ɣer Nietzsche: “Wenn Du zum Weibe gehst, vergiss die Peitsche nicht” (Mala truḥed ɣer temɣert, wer tettu arekkuḍ) , Mana yemsaḥ ɣer‑s belli ikarh timɣarin. Maca awala ɛemmer‑s ma yenna‑t netta, yewyit‑id deg udlis n “Amya yessiwel Zaradact” yeggit x yiles n Ict temɣert temɣer. Tenna‑s i yartista: “Ad traḥed ɣer temɣarin?” twessat wer iettu arekkuḍ. Maca wer das tenni wi ɣa yewten, wi ɣa yetwawten.
Ɣer ɛawd: