Ɛebdelwaḥid ḤENNU
Ḥajit majit, seksu d tyaẓiḍt, mala tweḍḍer-aneɣ a tt-naf.
Yekker di min yeɛdun, ttuɣa dinni ijjen wayrad ittɛic deg yijjen tagant, ttuɣa yeṭɣa x imudaren. Yeggur, wenni i t-idd ɣa yelqan deg webrid a t-ineɣ. Imudaren merra ttuɣa tteggʷden zeg-s, ttuɣa ttnuffaran, wer tteffɣen ula ad rzun min ɣa ccen.
Deg yijjen wass, munen imudaren merra, ggin agraw bac ad xarrsen di min ɣa ggen. Merra idsen xeyyqen s min xasen-ittekken aked wayrad. Uḥren xarrsen, ɣer uneggaru yenḍeq-dd wuccen, yenna-sen: “Necc ttwaliɣ wer nettejji ca ayrad a daneɣ-ineɣ ansam. Ittxessa kul ass a ɣer-s ittraḥ yijjen, a t-yecc, bac inneḍni ad ddren di lehna, wer tteggʷden, uca kul ijjen ad yedder mamek yexs, al dd-ɣa taweḍ nnubet-nnes, ad iraḥ ad isellem ixf-nnes i wayrad a t-yecc.”
Merra imudar iɛjeb-asen min dd-yusin x yiles n wuccen. Lexdenni, iruḥ ittazzel ɣer wayrad, ixebber-it s minzi ffɣen deg wegraw-nsen. Yenna-s wuccen: “Ssa d usawen nnehra qeɛ ma tmerrted ixf-nnec a x-aneɣ trezzud, a x-aneɣ tettazzled. Aqqa-c kul ass, macca-nnec a dac-dd-tettas al ifassen. nekkes awal ḥuma kul ass a dd-ittas yijjen zeg-neɣ a t-ttetted.“
Yerra x-as wayrad, yenna-s: “Min tennid ammu d asebḥan, maca sḥess a dak-iniɣ; Mala yeɛḍel xaf-i ca n yijjen, aqa a kenniw nɣeɣ merra deg yijjen tekti.”
Amenni nnit. Dewlen imudar ttasen-dd kul ass ijjen s yijjen ḥuma a ten-yecc wayrad. alami dd-tiweḍ nnubet n uyerẓiẓ. Ixarres, yenna aked yexf-nnes: “Mayemmi necc ɣa wceɣ ixf-inu i wayrad a dayi-ineɣ, a dayi yecc? Mayemmi wer ttxarrseɣ ayrad-a a t-nɣeɣ nnit, walli d netta i dayi ɣa yenɣen?”
Iruḥ uyerẓiẓ miɣis, yeɛḍel aked webrid. Umi ixecc ɣer yefri n wayrad, yufa-t wer yelli di ca. Yeccuɛri, yessufeɣ-dd accaren, iɛerra x wuyran… Ijeɛjeɛ-dd x uyerẓiẓ, yenna-s-dd: “Mayemmi tɛeḍled? Ass-a a c-cceɣ, ad nɣeɣ qeɛ imudaren.”
Yerra x-as uyerẓiẓ miɣis, yenna-s: “Raja a sidi ajellid a dac-ɛawdeɣ min dayi-yemsaren aked webrid. aqqa-c ttuɣa usiɣ-dd di lweqt nican. Iwḍeɣ-dd ɣer lwesṭ n webrid, msagareɣ aked yijjen wayrad nniḍen. Yexs a dayi-yecc! Nniɣ-as: aha! aqa ggureɣ ɣer ujellid-nneɣ, aqa necc ass-a d macca-nnes netta walli nnec. aqa mala teccid-ayi, a c-ineɣ!”
Ayrad yekɛa s min ittesla zeg uyerẓiẓ. yerni yenna-s: “Aqqa-c waxxa nniɣ-as amenni, Yenna-yi mana ujellid i ɣer-wem dinni, aqa a t-nɣeɣ, a kenniw nɣeɣ akid-s.“
iɛesseb wayrad, yenna-s i uyerẓiẓ: “Ugur sken-ayi mani yella wayrad-a a das-ssekneɣ lɛib i zi dayi-dd-ittaweḍ, d wehnunni i xaf-i dd-ittegg di tagant-inu.”
Iruḥ uyerẓiẓ aked wayrad, alami i t-yessiweḍ ɣer yijjen wanu yeccur s waman. Yenna-s: Aqqa-c ay ajellid-inu, da i yella, da i dayi-yenna a kenniw-rajiɣ.
Yessijj wayrad deg wanu-nni, ittwala udem-nnes deg waman, ittɣir-as d ayrad nniḍen. Iɛerra x teɣmas, yeccuɛri, ittwala ayrad-nni i das-dd-ittbanen deg waman ula d netta iɛerra x teɣmas, yeccuɛri. Lexdenni yenḍu deg wanu, uca yehwa deg waman al tisi.
Awarn i manaya, Munen imudaren merra, wtin-as deg wuru i uyerẓiẓ, Nnan-as: Saḥḥit x tiɣit-nnec, zi ssa d usawen, a nedder di lehna, bla tiggʷdi.