Awal deg yiḍes urid d lehlak ittili ɣer ca n yiwdan i wer itteṭṭsen bu mliḥ. Hi xenni manis i d-ittas manaya mani bab-nnes wer kid-s ittici ? Ma din ca n tebridin i zi nzemmer ad t-nekkes niɣ ad zzag-s nessenqes ?
Aṭṭas n midden wer teṭṭsen bu mliḥ s minzi ittili dag-sen wemnus, lehlak niɣ ca n twalatin ɣir d lweḥlan. Maca yeḍbiben waxxa amenni wer ssinen ca aṭṭas x wawal deg yiḍes. Wer ssinen ula kṭer mayen ittemsaren deg walli-nneɣ xminni nessawal deg yiḍes.
Wen iṭṭsen wer issin ila issawal deg yiḍes, ila mala kid-s ḥedd. Awal-nni izemmer ad yili d ahemhem niɣ d awal wer das-ifehhem ḥedd, ca n merrat ittili s ca n twinest amen tekmel. Din iwdan tteggʷden ad inin ca n wawal tili snuffuren-t. Maca imerzuten ttsuppuzan ila awal n yiḍes ittili x tudert tawussant. Ddegg-a wer ittili ca d aɛeffan x tzemmar n bnadem. D manaya ig inna usit n Microsoftnews.
Awal deg yiḍes iḍehhar-d ɣer iḥenjiren d irgazen kṭer zi temɣarin. Manaya tettirar dag-s tkasit ijjen tilalt d tameqqrant. Minzi mala issawal ḥedd zi lwalidin deg yiḍes, ataf ippudar ad ac-yaqeɛ manaya ula i cek. Aked uɣezids n tkasit, din timeslayin nniḍen ig ittiraren di manaya ameknaw :
- asexdem n ca n isafaren
- Xmi bnadem wer itteṭṭes bu mliḥ
- Timessi
- Xmi ḥedd ittili dag-s wemnus
- Alkul d nnikutin
- lweḥlan d uhtutti ittejjan bnadem ad as-d-yas uhelwes d uhemhem deg yiḍes.
Zeg ijjen uɣezdis nniḍen, inni i di yella insuminiya (inni wer itteṭṭsen s llilet) d yinni igguren amen ṭṭsen zemmren ad ssiwlen deg yiḍes kṭer zeg inni wer di yelli manaya. D manaya i yenna usit Amarikani Healthline.
Min iɛna ugenfi n wawal deg yiḍes ?
awal deg yiḍes wer ɣer-s bu ca n later x tzemmar n bnadem. S uya, maci uɣil ad as-tafed ca n ugenfi. Maca waxxa amenni, ippudar ad tseddɛed (t)acrik(t)-nnem/c mala tessawaled aṭṭas deg yiḍes.
Mala wer texsed ad teṭṭsed deg wexxam weḥḥd-k, xdem s ismalen-a i dak ɣa nini :
Ixess bnadem ad ireyyeḥ mliḥ, ad ibeɛɛed i yimunas. Ixess wer tettxarrsed deg imxumbal qbel ma ad teṭṭsed. S tmeddit ɛawed, wer tett bu ca n macca tedqel x stumaɣu, wer sess bu alkul d ugarru d ukafyyin ɛawed s yiḍ.
Yuga d arryaḍa mala ttegged-ten kul as ac-ɛawnen ɣar uzyenfi. Mamec ixess bnadem ad yeṭṭes mliḥ, ɛawed, wer dag-s walu bnadem mala yeḍfar ijjen usistim n macca i yecnin i tezmert n bnadem, macca tili dag-s ibiṭaminen, lmeɛden d tisent n macca i yetticen azyenfi d inirji i arrimet.