Aṭṭas zi mani, ila yeffeɣ umeqqran n tseḍma n Agraf Naser Lweɛzizi, iccetka x ubelleɛ n tebridin i yettawin ɣer ifistivalen i yettemsaren di tmurt.
Deg wass n 26 yulyuz n useggʷas-a, tɛewwel tseḍma-nnes ad tegg ijjen tmeddit n tẓuri di Lḥusima, mani adaf ad yili s ttmenyat. Aṭṭas n yewdan iɛejb-asen lḥal, maca di tminutin timeggura ad yagi lmexzen n Lḥusima ḥuma ad sseɛdan tameddit-a n tẓuri.
Qqaren imeḍfaren n tẓuri di Arrif : “belli adaf n tseḍma n Wagraf di Lḥirak n Arrif, s iɣennijen-nnes x inekraf-nnes i yewwḍen ulawen n midden, d manayenni i x-as d-irẓmen aglaf n ireẓẓa”.
Min irennin ccek deg yiger-a; aṭṭas n imeɣnas i ttuɣa yellan di Lḥirak n Arrif kksen x-asen adaf ɣer lxedmet min yejjin ijjen uzgen d ameqqran zzag-sen ad ḍefren abrid n weltaɛ zi tmurt n Arrif.
Uca ttwalan midden belli ddenf-a i immersen x imeɣnas, ad yili immers ula x tseḍmiwin n uɣennej Arifi ula d nitenti. Manaya isfekker-d s umqetmar i yekkin x tseḍma n “Twattun” deg iseggusa n tmanin d tesɛin d waṭṭas n imeɣnaj n uɣennij amezdag Arifi i wer yesbiren i tamara i x-asen ikkin di Arrif, ar mani azgen ameqqran-nnsen, ksin deg uḍar-nnsen ad ɛicen di tmura Tiwruppawyin.
Maca taseḍma n Wagraf, wer tessers bu ifassen ɣer tmurt, yeggur ad tettekk aṭṭas n tneddam d Tiwurappawyin, mani i ɣa dinni tessedder timedditin n useggʷas amaziɣ amaynu.
Beddu ad yili zi temdint n Antwerpen ass n 6 zi Yennayer, zi senni ad ḍwen ar Barsiluna ass n 13 zi yennayer, uca ad d-ɛeqben ɣer Rotterdam ass n 03 zi febrayer uca ad yuran di Frankfurt ass n 10 zi febrayer.
Tebda taseḍma tettɣennej di Arrif kṭer zi xemstac n iseggusa, mani tiweḍ ad tegg ijjen stil-nnes d amaynu ismunan jar llɣa Arifi s yezlan n lalla buya aked llɣa amaḍlan s imassen d imaynuten manaya i yewcin ijjen buḥbel d amusiki-nniḍen.
Merra manaya yegga-as i Agraf ijjen twasit deg wazzreg n uɣennij Arifi, mani tedwel zi tseḍmiwin i ttenhezzant aṭṭas di Arrif.
Deg wakud mani tiseḍmiwin n uɣennij Arifi wer zemmrent ad nhezzent di Arrif, yeggur ad yegg usinag Afransis i tseḍma n Rruk tamaziɣt “Meteor Airlines” ijjen usari n uɣennej di Lmuɣrib amen yekmel ad yebda zi Nnaḍur. Aya ittas-d deg yiger n usemɣer s useggʷas Amaynu Amaziɣ i idewlen d lɛid n bakansi, ttxellasen x-as di tmurt n Lmuɣrib.