D ij n ufilem ibedd x-as René Vautier, zegga i t-sqaden aseggas n 1949 bac a dd-isaqar ij n ufilem i yeccaten allun i tsertit n iḥewwasen, ij n ufilem x tzemmar n uselmed i tettegg Fransa deg ibilajen n Côte d’Ivoire d Usinigal D Usudan Afransis… Bac ad yexdem taprupagandat n ikulunyaliyen.
Maca René Vautier, i ttuɣa yellan d aḥudri ɛad (21 n iseggusa), ttuɣa-t yeswa s ixarrisen n ẓelmeḍ, i wer dd-ittisen aked wehnunni x yegduden d tukkerḍa n igelwan-nsen… Wami yiweḍ ɣer Côte d’Ivoire, iban-as-dd ad yeqleb tiṭṭ n kamira-nnes ḥuma a zeg-s dd-yeksi tidet n min ittemsaren, tidet n ɣezzu i tteggen iɛeskriyen ifransisen, xmi ssekmaḍen imɣaren n tqebbal amen ddren, xmi neqqen iḥenjiren d iḥudriyen d temɣarin waxxa s tdiset-nsent, xmi neqqen ula d lmal… Xmi ttakren igelwan, ttbeɣbaɣen iɣerruba ssakkʷaden ɣer Marsilya, maca ifrikanen sɛican-ten di leɣben d ukerfes d ɣezzu d idammen…
René Vautier, yeḍfer abrid n wul d tewdanit, abrid i dd-yemmalen tidet. Yessufeɣ-dd Afrique 50 aseggas n 1950, d afilm amezwaru i yellan d warakulunyul…i dd-yemmlen i Fransa udem-nnes di tisit, d min tettegg di Tefriqt. Fransa, wer zeg-s bu tɣerma a tt-tawi ɣer yegduden ifrikanen, wer zeg-s bu uselmed n iḥenjiren d tḥenjirin di Tefriqt… Fransa, zeg-s igelwan, a ten-dd teẓẓi s minzi ma, waxxa s idammen n Ayt bab-nnes.
Yettwaṭṭef René Vautier awern-i ufilem-a nnes, ggin-t di texxamt, yesseɛdu x-as aseggas n lḥebs. Afilem-nnes, 40 n iseggusa d netta yettwamneɛ di Fransa.
Zi ssenni, iruḥ bab n ufilem Afrique 50 ɣer Ddzayer, din ɛawed i yixḍar ad yerr tiṭṭ n kamira-nnes ɣer ɣezzu i din tettegg Fransa, ad iɛawen igrawliyen n Ddzayer s minzi izemmer a ten-iɛawen.
Yegga ij n ufilm aseggas n 1956 x manaya, yerni ij n ufilm nneɣni aseggas n 1958 isemma-t “Ddzayer tkemmeḍ” . Yeqqim di Ddzayer zegga i testaqel, ar ɣa iḍer x uyis n tudert aseggas n 2015.