16.1 C
Nador
Ssebt 13 Yebril 2024

Aḥewwes n Selwan ; ij n umegrad uran-t yefransisen di 1909.

Amegrad-a, ittadef di teprupagandat n iḥewwasen deg imezwura n lqern ɛicrin, wami i ttuɣa dd-sseqḍaɛen uylan-nsen ɣer tmura n wadday i lebḥer acemlal, zeg-sent tamurt n Arif. Aklasi-ya n imegraden, waxxa uran s lxezrat n ikulunyalen, maca nettbedda deg-sen x yij n uɣezdis n temsarin i wer nettif ca zemmement mani nniḍen. S uya, asedwel n weklasi-ya n tira ɣer tmaziɣt, d ij n ccan yemɣar i tmaziɣt s yexf-nnes, d umezruy n Arif i yeffuk a nessif, a ɣer-s nexzar s lxezrat-nneɣ, neccin ayt bab-nnes. Tiɣri n imegraden-a s yiles-nneɣ amaziɣ, d ij usurif n uzelzi n tɛejjajt x umezruy-nneɣ, ḥuma a ɣer-s nqad abrid.

Ɛ.Ḥ

Wer dd-yusi bu yeqseḥ x lɛesker n useppanyu bac ad adfen ɣer teqseft n Selwan, i dd-yusin di lgeɛdet n buɛerg, tiggʷej s ca n 25 kilumiṭ x Mlilt. Selwan, ttuɣa ssersen x-as iseppunya tiṭṭawin. Min teɛna teqseft-a qeɛ ? yallah d ij n leqwar yuunneḍ-dd, deg-s ca n 200 miṭru zi mkul jjihet.

Xemsa n iseggusa, d urugi Bu Ḥmara yerken deg-s di Selwan, deg-s i ttuɣa yettkun. Deg ineggura n useggas i yeɛdun, ḍarqen-t irifiyen, wer sen-yeɛjib bu lḥal lami yegga ifilan aked irumiyen. Nnhar n yiḍa, arugi yemmut, taqseft tarifit temfertak, lexxu, Selwan aqqa-t deg ufus n iseppunya.

Waxxa aḥewwes n Gurgu d Selwan ɣer-s ij n lhimmet temɣar, maca manaya wer yelli bu d kulci, wer ifessi bu wemxumbel n uɣewweɣ n Arif. Jer Gurgu d teqseft, din ij n wemkan qeɛ d idurar, deg-s i llant qantirat n lmeɛden i ttuɣa yesseɛdu urugi i tmessurin (sociétés), i ɣer ɣa yaweḍ webrid n macina zi Mlilt.

Lxedmet n webrid n macina, ɛad wer tiwiḍ ɣer Nnaḍur. Maca wer nettettu aqa abrid-a n macina, d netta i ttuɣa d ssibbet n uɣewweɣ n irifiyen. Amkan-a i di yella lmeɛden, zeddɣen deg-s ayt Buyefrur. Nitni, amen nessen, wer sellmen ca.

Wer dd-ittbin ca belli yemra x iseppunya ad adfen deg wemkan-a, ad ssiwḍen iraqen-nsen deg yeɣzar n wureɣ (rio de Oro) aked terfiqin n lɛesker i yellan di Selwan. Awern-as, ad tili tmurt-a merra deg ufus n ujiniral Marina, zi Mlilt ar ixf n waman (Qabuyawa), tewta 80 kilumiṭ zi ccerq ɣer lɣerb, 15 kilumiṭ zi nnej ɣer wadday.

Aḥewwes n tmurt-a ad yili yehwen xmi ɣa dewlen ifellaḥen ɣer tyerza. Mala nexzer ɣer uberru n yergazen i dd-yettwasqaden zi yulyuz i yeɛdun. Iseppunya ɛemmden x-as nican ad ḥewwsen timura-ya, ar ɣa yettwafekk wemxumbel n mulṭat.

Taqsuḥi n Mulay Ḥafiḍ :

Amen daneɣ-dd-yiweḍ zi Fas, aqa mulay Ḥafiḍ aqqa-t ayenni ma yiweḍ ibedd deg wudem n ssulṭa.

Ineḥbas i ttuɣa aked urugi, i ttuɣa iyezmen, ssufɣen-ten-dd bac a ten merrten s tisent, a ten-mellḥen. Qessen ifassen i imehlak, ruccen-ten s tmellaḥt, xergen-asen iwanṭisen n ccerk, xeyyḍen mliḥ. Ipubriten-a, ad rnin amerret x umarret.

Le SAINT-QUENTINOIS, 80’ année, N° 229, 1er octobre 1909.

Timaynutin

Ɛebdelwaḥid
Ɛebdelwaḥid
Abdelouahid Hennu

Fser-itt