15.1 C
Nador
Letnayen 4 Mars 2024

Aḍuqqez i yemsaren di Lubnan ma izemmer ad issiweḍ ilubnaniyen ad ɣeḍlen nniḍam i iḥekkmen?

Yura-t: Ɛebdelɛazi Ḥannun

Aṭṭas n tneɣmasin ( ssuḥuf) d iraqqen n ineɣmisen ḍefren min ittemsaren g Lubnan g ussan-a, awarn i uḍuqqeẓ n Bayrut, d wufuɣ i ggin luluf n ilubnaniyen iḍennaḍ n ssebt 8 zi ɣuct, bac ad sɣuyyen xef imessuguren n tmurt-nsen, minzi wer ggin walu awarn i uḍuqqez-a.

Mmuten g ubeεbeε n Bayrut ass n tlata 4 ɣuct 2020, 158 n yewdan (mala drust) ngezzmen ujar n 5 alaf, rni-dd ɣer-s 300 alef temmenḍar, d uḍeyyeε i yemsaren i tudrin d yebriden d leswaq..

Bezzaf n yewdan ffɣen bac ad ssekknen i imessuguren isertanen ( iseyasiyen) n tmurt-a, axeyyeq d ukrah i dasen-ggin, iwḍen ad dexlen xef tzeddaɣ n imawasen ( arruyas).

Awarn i manaya, ffɣen-dd aṭṭas n imassnawen qqaren: tɣuyyit-a ad tessiweḍ ilubnaniyen ad ɣeḍlen izellifen imeqqranen n Lubnan.

“Akud d aεeffan”

Yura Abu Iyyad Caqra di tneɣmast ( ljarida) n ccerq n lwest n Lundun : “Aḍuqqeẓ ameqqran issiɣ isefḍawen n tegrawla ( ttewra) di Lubnan. Iɣuyyan i yellan di ccariε n Bayrut, jjin tamdint-a tettedder ca n wussan d iεeffanen”. Irni xef-s Abu Iyyad Caqra : “Aḍuqqeẓ-a i yemsaren, d uweḍḍer i tegga ddewla n Lubnan bac ad tessenjem iwdan i xef dd-hwant tzeɣwin n tudrin. azgen ameqqran n ilubnaniyen ttwalan ddewla-nsen d anewwar n dduwal timeqqranin, mammec zarren Ḥizb llah i yellan d aḥarrac n Iran di ccarq n waεraben”.

Yerni : “Awaḍ i yegga Micil Ɛawn ɣer leḥkam d girra i di yudef Ḥizb llah bla ma icawer ddewla n Lubnan, isskan-aneɣ illa ḥizb llah, afus-nnes imɣar xef ufus n ddewla. Manaya immerni aṭṭas zeggami yeṭṭef Micil εawn leḥkam, idwel ḥizb llah ittaweḍ-as wawal di marra min itteqqnen ɣer tsertit (sseyyasa) d teflast ( el amn).

“Yebda leḥsab”

G umzwaru n tneɣmast n Lqabas; iwdan dewlen ɣer ccariε, maca lexxu smizran abeddel n imursuḍen ( lmufsidin) s minzi ma, dewlen yewdan n Bayrut d qaε Lubnan wer ḥemmlen ad qqimen imursuḍen-a di leḥkam.

Azzarg n CCuhada -iḍennaḍ- iccur s yewdan i dd-yussin zi mkul amkan ḥuma ad sɣuyyen xef imessuguren-a, ssilyen tifray g ujenna uran xef-sent ” ass n lḥisab” “ass n tɣawt” ( lintiqam) .

Terni tneɣmast-a : Iḍḍuqqeẓ-dd ccariε s tfeqqaε n yewdan g wass n lḥisab, iwdan uglen tijeyyafin deg wammas n temdint, ttettren ad ttwakerfen lmujrimin. Wer nettiggʷij ca xef iɣuyyan i yekkren di Lubnan ; isseqsa Γassan salibi di tneɣmast n Nnahar n Lubnan : Man abrid i ɣa ḍefren yegrawliyen ( ttuwar) awarn i uḍuqqeẓ n Bayrut?

Yenna Salibi: Ssulta d nettat i ɣa yeccen aεmud awarn i uḍuqqeẓ, minzi wer teggi ca lxedmet-nnes amen tenna; tejja timeslayin yeḍḍuqquẓen di temdint ujar 6 isggʷasen, manaya yejja iwdan ffɣen ad sɣuyyen di ccariε.

Yerni Salibi yenna: wer yessin ḥed mani ɣa yessiweḍ manaya di Lubnan minzi nettwala qaε dduwal n dduneyt ttεawanent Bayrut. Arzaf i dd-yegga arrays n Fransa ɣer Lubnan ma d areẓẓum xef ssulṭa-ya i ttuɣa yekksen aked waṭṭas n dduwal niɣ d beddu n wadaf n dduwal n dduneyt bac ad kksen tizemmar i nniḍam-a?

“Tassast ( azma ) n nniḍam”

Tanɣmast n Ddeyyar n Lubnan, g teffert ( ssefḥa) tamzwarut : “tassast n nniḍam wer telli n tsertit, iwdan i yeffɣen, ffɣen maḥend qaε inni i issegguren ad ttwaṭṭfen, ad beεɛden i ssulṭa”..

Jer min ittwannan di tneɣmasin d min nettwala di ccariε n Lubnan, nzemmer a nini; Lubnan ittraja-tt usegged n waṭṭas n tmeslayin.

Timaynutin

Fser-itt