Deg ubrazil, aṭṭas n imezdaɣ imezwura ttsufran zi lxezrat i ɣer-sen dd-xezzren. Iḥudriyen-nnsen tteggen tizemmar maḥend ad bedden ddegg-a n lxezrat s usxdem n traccwin tinamunin. Ttexsen ad dd-mmlen min ɛnan ad smunen jar leɛwayed-nnsen d tetrart.
« Lḥukuma trezzu ad aneɣ-tneɣ merra ». D wa d awal i yura ij n uḥudri x ifassen-nnes maḥend ad isɣuy kunṭra i isenfaren n ikaryaren i yellan deg wemkan mani izeddeɣ. Aṭṭas n iḥudriyen n teqbilt n Pataksu i izeddɣen di jjihet n Bahiya deg yeffus uẓelmeḍ n Brazil. Tteggen tizemmar ḥma ad ssiwḍen imesli-nnsen n uɣewweɣ kunṭra i lḥugra i din ttafen imezdaɣ umezwura. X manaya, tisuta tiḥudriyin ḍeffren ca n tebridin d timaynutin bac ad fesren aɣewweɣ d tseqqar-nnsen. Manaya tteggen-t x webrid n tɣemsa d lmidiya.
Ca n iḥudriyen zeg imezdaɣ n Brazil imezwura, tteggen ca n ividyuten x YouTube. Bac ad kksen lferz, ad kksen ɛawed ula d tayyut x tussna-nnsen d wagdud-nnsen. Aṭṭas n midden wer dasen-fehmen ca. Iḥudriyen-a kul ijjen manis, kul ijjen d taqbilt-nnes maca d tizemmar-nnsen i itteggen i ten-ismunan. Mamec ɛawed ttexsen ad saqaren ividyuten i zi ɣa ssiwḍen tibratin-nnsen x webrid n traccwin tinamunin. Iḥudriyen sxeddamen ividyuten bac ad zemmemen tussna d yidles-nnsen ḥma wer ittweḍḍir.
Zeg iḥudriyen-a nettaf Cristiano Waryu, i yettexsen zi tbadut-nnes x YouTube ad igg ca n imursuten n uvidyu immal-dd dag-sen imxumbal i yettafen imezdaɣ imezwura. Waryu isrusa ca n iseqsan x wagdud Abrazili, iseqsan x min ixes ad yini ad tilid zeg imezdaɣ imezwura d mamec i kid-sen ittemsurruf wamun. S uya, ismuttuy-d i yiwdan i t-iḍeffren imxumbal i tteddren nitni kul ass. Ameknaw xmi i ttafen midden ila netta isxeddam ttilifun, uca ttasen-d ttseqsant mamec ca n ijjen zi lizandyan izemmer ad issxdem ttilifun?.
Cristiano Waryo iɣra tussniwin n wemsawaḍ deg ukapital n Brazil. Mamec isselmed ixef-nnes ad ifhem mliḥ ddijital d internet. S usxdem n ca n ikumpyutren i ttuɣa i das-dd-ittawi baba-s. Icuqq abrid-nnes ɣer iprugramen d usujed n ividyuten. Iqqar « Xseɣ ad saqareɣ ca n ividyuten cnin ; manaya i izemmren ad issiweḍ tabrat-inu d tebrat n waṭṭas n midden zeg wamun-nneɣ. Ass-a 35 alef n yiwdan iḍeffren Waryu x YouTube.
Zeg ij n uɣezdis nniḍen, Alis Pataksu tettegg tizemmar-nnes maḥend ad tessiweḍ leɛwayed d tebridt n tudert n wegdud-nnes i Ibraziliyen. S uya tegga ij n usit i manaya, maḥend ad tari x leɛwayed n wegdud-nnes. Kulci manaya tettegg-it s usxdem n Internet d tebridin titiknulujiyin timaynutin.