Le Rifain
Qbel, ttuɣa iɛessasen n sekwilat meḥsubin x lwizara, d nettat i zeg-sen ittkellafen. Maca zi 2003, tesseɛdu lwizara ḍḍusi-ya, tegga-t deg ufus n ccarikat i ittkemmacen ttmenyat s uɛurric, maca cerrzent x uxeddam, ɛeffsent x tseqqar-nnes.
Aɛessas n sekwila i ixeddmen ɣer ccarika, yedwel ittegg kulci, min ma nnan-as. Mala wer yeqbil, a t-ssekken di tewwurt. Iḥeṭṭa adaf d wufuɣ n imeḥḍaren, ittkellaf s taẓẓut d tbeḥḥar n sekwila, ittbeyyaḍ, ifarreḍ, ittsexxar i lmudir, yessirid-as ṭṭumubin… Manaya merra s ttaman wer yiwiḍ ula d rebɛin mmya i char.
Rni x manaya, xeddmen kter zi 12 n tseɛɛatin i nnhar. Deg-sen inni ixeddmen azil d tmeddit. wer kessin la kunji la walu. Ccarikat i yessexdamen iwdan-a, wer ttwassnent ca, wer ɣer-sent bu wemkan di tneddam mani llan ixeddamen. Ttɛamalent aked ixeddamen am nnumrawat n wetliffu, nnhar i xsen a ten beddlen, yehwen x-asen array.