Ribarroja del Turia (Spaniya), 30 ukṭ 2024 (AFP) – Dewlen ibriden d tisellya n ubellaɛ, mani immers “ẓeyyar” x imezdaɣ, tuɣ-iten “tiggʷdi”.
Wwḍen ad ggen lḥemran n iɣezran ineqqen aṭṭas n arrwina, deg yeffus n usammer n Spaniya, min issiḥlen pumpirus, i d-yusin zi manis mma.
Yenna José Manuel Rellán i yellan d ijjen zeg imezdaɣ Ribarroja del Turia, di jjwayeh n Valencia: “Inneqḍeɛ ufilu n wemsawaḍ x-aneɣ (…) ibriden merra nnqeḍɛen, leqnaḍer rid amenni, ca n twalatin ili ɣeḍsen deg waman”, yerni iɛawed-d ila isseɛda llilet i yeɛdan deg imxentisen.
Di jjihet-a, “ca zeg imukan yewḍa dag-sen 500 yetru n waman deg ijjen umitru amekkuẓ di 12 n sswayeɛ. Awern-as, aqqa tettwalam min yellan”. D aya i yenna uspanyu-ya bu 49 n iseggusa i AFP, d netta isskan ɣer ubellaɛ i d-ittbanen deg yebriden n ubilaj-nnes.
Inuẓar n waman i ttuɣa yeccaten di llilet i yeɛdan, yejja iɣzer n Turia i d-ittekken x ubilaj-a bu 22.000 n imezdaɣ ittnḥeddan x Valencia, ad d-yeffi s waman, yewta ẓẓeyyar x waṭṭas n imezdaɣ i iḥeslen di tudrin-nnsen niɣ di ṭṭumubinat-nnsen.
Ca zeg ixeddamen sseɛdan llilet-nnsen di fabrikat-nnsen minzi wer ufin mamec ɣa ggen ad ɛeqben ɣer tudrin-nnsen.
S teynert tekres, yenna Rellán “ɣer-i aṭṭas n imeddukal umi iruḥ kulci. Tudrin-nnsen, ṭṭumubinat-nnsen, kulci iruḥ-asen… Fabrika mani ttuɣa xeddmeɣ terdel. Aya yeqqseḥ qbala, minzi wer nessin min ɣa yewqɛen zi ssa d usawen.”
Tettɛawad Esther Gómez i yellan deg useqqim n ubilaj-a mamec sseɛdan ijjen llilet n sstris d arrwina, mani pumpirus ttuɣa mmersen deg ijjen lḥal yeqqseḥ aṭṭas. “Di ca n tminutin d tuqlilin, neɛda zeg ijjen wemkan yehna, ɣer ijjen lḥal n arrwina n tidett.” I d-tenna.
Terni tenna-d tmeṭṭut-a min ɣer yella xemsin n iseggusa di buḥbel-nnes “Iwdan ggin merra min x-asen. Pumpirus, ttuɣa wer ɣer-sen min ɣa ggen ula d nitni, ttuɣa wer zemmren ad awḍen ɣer merra imukan inḍerren”. Mamec i d-twekked ila manaya “wer yuqiɛ aṭṭas zi mani, neccin qa neggʷed.”
Ar lux, ca n 72 n yewdan i yemmuten, aman redlen aṭṭas n yebriden, mamec qeḍɛen ula d ibriden n macinat, mani ca n 155.000 n yewdan ila traḥ xaf-sen tfawt.
Di La Alcudia, abilaj bu 13.000 n imezdaɣ i d-yusin 49 KM x Valencia, wḍan-d 150 yetru n waman deg ijjen umitru amekkuẓ, min yejjin ad yeffi iɣzar n Magro i kid-s iwwin abarru n ṭṭumubinat d yewdan.
Tenna Eva Sanz i ttlibizyu n TVE “abilaj inneqelb x uzellif-nnes”, mani i d-terni tenna-d ila “teggʷed aṭṭas zeg walay n waman, iɣzar igeɛɛed di tlata ma rebɛa n tminutin, uca ibeddel panurama amen tekmel”.
Deg ijjen tinawt yenna José Miguel Basset amɣar n pumpirus di jjihet n Valencia “S usḥissef, lḥal n ujenna yejja min ɣer-neɣ d dduzan, wer ittqiddi ḥuma ad naweḍ ɣer merra jwayeh i yelqef lḥemran n yeɣzer”
Yerni yenna “Niweḍ ad nessnjem 200 n yewdan llilet i yeɛdan, newwi-ten ɣer lemwaḥel-nneɣ, newca-asen tazeddiɣt, d dduzan, maca timeslayin ttuɣa mxumblent nican minzi ila din ɛad iwdan nnuɣen deg ibriden”.
Ɛlaḥsab tanbaḍt tanammast, i yeggin tlata n wussan n leɛzayet tanamurt, fesren ca n alef n iɛeskriyen di jjihet, aked ca n 1.500 n ipulisen d ijadarmiyen. Merra manaya ḥma ad afen iwdan i yella ɛad weḍḍren.