Kigali/SMN – tefser-d Rwanda ijjen uplanu i zi xsen ad ẓẓun ca 65 melyun n tcejjert di tmurt amen tekmel deg useggʷas anamur n taẓẓut n tcejjura 2024-2025.
Yenna-d wegraw n taganin di Rwanda, deg usiweḍ-nnes, ila issujed-d ijjen uplanu ḥuma ad yeẓẓu 65.2 melyun n tcejjert deg useggʷas anamur n taẓẓut i d-ibeddan zi 26 kṭuber ar 26 nuwanbir i d-ittasen.
Amek i d-issfaw, tasentayt-a trezzu ad tbedd deg wudem n ubeddel n uklima, ad d-tessemɣer zi tmura i yehruran deg waṭṭas n iraqqen di tmurt.
Issken-d usagem-nni nit, ila surif-a wer ixes ca ad d-yerr taganin inḍerren waha, maca irezzu ad isseqseḥ ula zi taẓẓut d uḥeṭṭu n isistimen n twennaḍt i yeqqnen ɣer iɣezran, ḥuma ad afen luḥuc min ɣa ccen.
Yessers-d ugraw-a asentel n “ẓẓu tacejjert, ttenhella dag-s, ssenjem tamurt”, mani i d-issruɣa tifawin x tmasayt icerken i yezdin ɣer uḥeṭṭu n tmurt, ittwekked, di twalat d icten, x “tilalt n kull ijjen zzag-neɣ deg uḥeṭṭu n twennaḍt-nneɣ i tsatalin i d-igguren.”
Yenri-d ila “s lxedmet imunen, nzemmer a negg ijjen ubeddel d ameqqran di twarrit n taganin-nneɣ, a neḍmen ijjen yimal ineddwen s tudert i tsatalin i d-igguren.”
Ttqeddren asayrar n tduli anagan di Rwanda ɣer ca n 700 alef hiktar, min itteggen 30.4 di miyya zeg usayrar amen ikmel n tmurt.
Txes Rwanda, zi tazzut-a, ad d-terr ca n tnayen melyun hiktar zi tmura i yehruran deg wawaḍ n useggʷas n 2030.