I mala cek/cem teggured, tehnid, tessned wer tukired, wer teksid, wer tessersed fus x igelwan n wegdud !
Tessned ila wer teggid qaɛ min xef ɣa teggʷded ula xef ɣa tcacid..
Maca, ijjen cwayt, tettraggʷaḥed ad teẓred tamurt, ad tekksed leɣben di Arrif-nni i dag-neɣ, ad tecced iselman-nnes, ad tcemmed lhawa-nnes, ad takid s tmeddit-nnes d tfukt-nnes.. Uca hupp, ad cem/cek-sbedden di lmaṭar x ijjen ddusi teɛda x-as 37 n useggʷas, aseggʷas ineṭṭeḥ deg uma-s.
Ma tessnem min teɛna 37 n useggʷas di lɛumur n ddewla?
Zi senni ar lux, ɣeḍlen lḥiḍ n Berlin, raḥen dag-s isuvyatiyen di therhert, tekka girra di Lkewit, msetfaqen ifilisṭiniyen aked israyliyen di Oslo, nɣin Isḥaq Rabin, ḍelqen i inekraf n Tzmammart, beddlen ddustur di 1996, ireggʷeḥ-d Braham Serfati ɣer Lmuɣrib, yemmut Ḥasan wis tnayen, yewḍa jeddi x uɣyul-nnes acemlal, ggin asinag n Tmaziɣt, Ben Laden isug x Umarikan, wcin druus n tesɣart i temɣart, smunen-d ci n yewdan ḥuma ad ssiwlen x min yeɛdan, semman-as “iseggusa n uqerṭas”, Dɣerni iḥma-as uzellif ixes ad igg amulli, yekkes-as-t Lmexzen, ɣeḍlen Benneɛli di Tunes, Lgeddafi di Libiya, Ḥusni Mubarik di Misra, beddlen ddustur di 2011, igeɛɛed PJD ɣer lḥukuma, ḍelqen-as i Danyil, wenni inɛedden x iḥenjiren imeẓẓyanen, ɛawed ṭṭfen-t zegga yuqeɛ llahuma hada munkar, ggin Chouf Tv, ḥeryen Muḥsin Fikri deg ukamyu n wefraḍ, ṭṭfen Zzefzafi, maca …
Maca merra manaya, i yekkin, i yeɛdan, i neẓra… Yejja lbulis n Nnaḍur wer ittu ict tḥenjirt ila ɣer-s xenni 17 n iseggusa tesɣuyy x lḥeqq-nnes, lux d tamɣart s tarwa-nnes, uca ad tt-sbedden maḥend ad d-erren sinta taqdimt, ataɣ ili weḥḥcen iseggusa-nni amenni, tuɣ-iten teḥnint, uca wer ufin mɣar Asmaa-nna zzat-sen, wi issnen?!.
Msuluḥen aked merra wi yeggin ca deg iseggusa uqerṭas, mɣar “ddusi” n Asmaa-nna, ugin ad t-ttun, ugin akid-s msuluḥen.
Maca, min din awerni i usendef n uyezzim-a? Min xsen ad inin? Mayemmi raḥen ɣer ijjen temɣart tcuqq abrid-nnes weḥḥd-s deg ijjen tmurt d taberranit, zegga i ila tetturja ad teqqim gi tmurt-nnes, ad g-s tɛic s tlelli d wuddur.
Maci ḥa sbuxsyen tarjit-ines; maca sbuxsyen ula asitem-nnes deg ijjen tmurt d tadimukraṭit.
Mli d ci n ddewla, tessen min teɛna Asma-nna, ili snewjent-id s nnwac, minzi d ijjen temɣart i yettḥaman x temɣart, x iles-ines, tessili zi ccan n tarwa n tmurt-nnes jer tiṭṭawin n Iwruppawiyen; maca lmexzen ila ɣer-s ijjen erray-nneḍni…
Ma manaya d fayyu?
Wah d fayyu d ameqqran, maca wer din bu ca n ḥajet wer das-qqaren aqqa “maci s neɛmada”, neɛmada-nni aqa-tt din, yezdeɣ d ssus n tdimukraṭit d tlelli n wawal, isseka-d tabrat, ixes ad yini ca.
Min rezzun ad aneɣ-inin s manaya?
Walu.. Rezzun ad inin ila amjar qa d wenni, beddlen-as fus waha.