Ẓeg uɛebbuḍ n tẓaẓragt Alpha Print Maroc di Ḍḍarlbiḍa, ffɣen-dd tnayen n yedlisen d acniwen, munen-dd ḍar aked uḍar ḥuma ad slellcen azzerg n tsekla tarifit. Acniwen-a, s tnayen, meḥḍen ixf-nsen di lista n wammuden n tqessisin, i yulyen x tinni n yeklusay nneɣni n tsekla i dd-yeffɣen di Arif, am wungalen d tullisin d tmezgunin…
Adlis amezwaru, yura-t wezlawi Majid Aqelɛi, zeg yemhajaren irifiyen i ittɛicen ajemmaḍin, isemma-t “Merwes-iwdan”, i yellan d azwel beɛda ula n yij n tqessist aqqa-tt ɣer daxel n wamud.
Wiss tnayen, yura-t Andic Cahid, yixḍar-as azwel: “Zi lwacun n tmurt”. Wa aneggaru, zi tefsarin n tmesmunt “Adlis Amaziɣ”.
Idlisen-a s tnayen, urid d asefru am isefra, maca d aswiẓẓeḍ ɣer wesmaynu, d tɣuyyit teffay-dd zi mkul tguri zi tguriwin n tqessist, tessetliɛ imeɣri ɣer umaḍal n tcuni d wesneflul.
“Merwes-iwdan” d “zi lwacun n tmurt”, d tnayen n yedlisen i dd-irezfen s tɣuyyit ijehden, ḥuma ad rẓen assɣad yessaggʷaden, i yersin x wazzerg n tasekla tamaziɣt di Arif, i umi nessutara lebda tinecla.
Zi jjdid i zi dd-rezfen tnayen-a n imerzaf, sennej i tcuni n tqessisin, d tcuni n weɣlaf i dasen-ixelqen, din ca n arrsumat i yessidef “Aqelɛi” deg waṭṭas n tefray n wammud-nnes, rni t-as aẓẓli, rni x manaya, ca n tassut ittessu-tt qbel wadaf ɣer kul tqessist, d tanebdat, yeffuk a tt-yessurf yimeɣri ḥuma ad yessij x min din ɣer daxxel.
Andic ula d netta, yehda kul taqessist i yij n uterras yejja later-nnes deg umezruy, yessiwel x iterrasen-a, yessessen-iten ɣer imeɣran, d ij n usemɣer s min ggin d min wcin, d lhimmet i ɣer-sen deg wul d lbal n wezlawi.
Imuden, s tnayen uran s usekkil alatan, d tamerniwt temɣar i tsedlist tamaziɣt.
