Lionel Messi d Cristiano Ronaldo d nitni i yeṭṭfen azzreg n tcamma n uḍar i waṭṭas n iseggusa, maca zemmren ad yili d ta twalat-nnsen tameggarut i di ɣa rebḥen tkuppat n umaḍal.
Tnayen-a n imiraren, weyyen merra tiberziwin d tkuppat aked tseḍmiwin-nnsen, maca yalleh weyyen ijjen tkuppat n tmenẓawt aked tseḍmiwin-nnsen tinamurin.
Messi d Ronaldo d ijjen tnayen zeg waṭṭas n imiraren illa zemmren ad tili tkuppat-a n umaḍal i yellan di Qaṭar 2022 d tameggarut-nnsen deg wecrak deg umundyal ; lista n imiraren dag-s :
Cristiano Ronaldo (Purtugal).
Nzemmer a nraja kulci aked ijjen am Ronaldo, maca iggur ad ɣer-s yili 41 n useggʷas di tkuppat n umaḍal i dd-igguren, Itɛin amundyal n Qaṭar wenni d ameggaru-nnes.
Ronaldo ila yenna qbel belli netta wer isbeddi ca tirart-nnes awerni i wemundyal n Qaṭar, inna ila ixes ɛad ad yirar aked tseḍma n purtugal i « ca n iseggusa-nniḍen »- wi ɣa issnen min ɣa yuqɛen ?
Imal-nnes wer t-issin ḥedd aked tseḍma-nnes deg wussan-a, zegga yegga ijjen wemsawal mani ikritika Manchester United.
Ronaldo izwar-as iddez azgen ameqqran n nnumrawat di tberziwin n tmura n Uruppa – icrek deg waṭṭas n tberziwin, yirar aṭṭas n partidat, izemmem aṭṭas n igulen – mamec indeh taseḍma n purtugal ad tawi tkuppat aseggʷas n 2016.
Aked uyenni, yettwaḥsab zeg imiraren izemmemn aṭṭas n igulen aked tseḍmiwin tinamurin, s ca n 117 n igulen, zzag-sen ijjen uhatrik di tracca n tseḍma Taspanyut di tkuppat n umaḍal tameggarut di Rusiya.
Amirar-a Apurtugali i yewwḍen 37 n useggʷas, d ijjen zeg imeqqranen n imiraren n tcamma n uḍar deg umezruy, mani izemmem ca n 700 n ugul di tseḍmiwin min ked yirar, yewwya ca n 30 n tberza, yewwya amirar yifen xemsa n twalatin deg umaḍal. Maca d ta twalat tameggarut maḥend ad yerni tkuppat n umaḍal ɣer tebyugrafit-nnes i yeccuren s min yecnin.
Lionel Messi (Arjuntin)
Nzemmer di tidett a dd-nɛawed aṭṭas n tmeslayin min xef nenna x Ronaldo, d neccin nessawal x Messi, i ɣa awḍen 39 n useggʷas di tkuppat n umaḍal i dd-igguren.
Nɣall ad x-as nini ila zeg imiraren imeqqranen deg umaḍal, izemmem 695 n ugul aked Barcelona d Saint Germain, mamec i yewwya amirar yufen deg umaḍal sebɛa n twalatin, wa d ijjen nnumru wer ɣer-s iwwiḍ ula d ijjen umirar deg umezruy, yendeh taseḍma Tarjuntinit ad tawi tkuppat n tmura n umarikan n yeffus (Copa America) di twalat-nnes tameggarut.
Maca mala yewwya tkuppat n umaḍal di Qaṭar izemmer aya ad issers amirar-a aked imeqqranen n tcamma n uḍar aked Pelé d Diego Maradona, i inni i yettwalan belli amirar ixess-as ad yawi amundyal bac ad yili zeg imeqqranen qqaɛ.
Ittirar Messi tcamma n uḍar d netta aqqa-t mliḥ, zegga izemmem 11 n ugul, isenneɛ 14 di 18 n partidat aked Saint Germain.
Yenna Messi, zegga ttyarita, belli tanita i ɣa yilin d taberza tameggarut n tkuppat n umaḍal ɣer-s netta, maca ɛad wer nessin min ɣa yemsaren deg yimal, minzi netta ila iɛewwel qbel ad isbedd tirart-nnes maca yedwel-dd ad yirar aked tseḍma tanamurt.
Robert Lewandowski (Pulanda)
D tanita d twalat tis tnayen i di ɣa yirar itri Apulandi Robert Lewandowski di tkuppat n umaḍal, maca tzemmer ad tili d tameggarut ɛawed.
Wer yewwiḍ ca amirar-a min ɣer yella 34 n useggʷas – izemmemn ca n 18 n ugul di 19 n partidat aked Barcelona deg useggʷas-a, ad izmmem ca n ugul deg umundyal n Rusiya i yeffɣen zik zzag-s.
Izemmem itri n Bayern Munich xemsa n igulen di 11 n partidat min ked yirar aked tseḍma n Pulanda di tmeggura n tkuppat n tmura n Uruppa, maca izemmer ad tili d tanita d tameggarut-nnes maḥend ad izemmem di tkuppat n umaḍal.
Neymar (Brazil)
Yettwaḥsab Neymar, 30 n iseggusa, ameẓẓyan-nnsen qqaɛ di llista-ya, maca di tidett inna qa belli tzemmar ad yili amundyal n Qaṭar d ameggaru-nnes.
Itri-ya Abrazili yenna azzɣat : « Ad tili d tameggarut ɣer-i nec. Wer ssineɣ ma ɛad ad ɣar-i ilint tizemmar maḥend ad cerkeɣ ɛad ». Maca awern-as yessiwl-dd yenna ila awal-nnes wer t-fhimen ca mliḥ.
Maca qa izemmer ad yendem Neymar – izemmemn 13 n igulen, isenneɛ 11 zzag-sen aked Paris Saint Germain aseggʷas-a ; mani iwweḍ ad izemmem ca n 75 n ugul aked tmurt-nnes.
Lwis Swaris (Urugway)
Lwis Swaris ɣer-s 35 n useggʷas, s uya, am imeddukal-nnes di Barcelona, Messi d Neymar- tzemmar ad tili d ta d twalat-nnes tameggarut di tkuppat n umaḍal.
Amsugi n Liverpool d Barcelona d Ateltico Madrid, illa idwel ɣer tseḍma-nnes tamezwarut Nationale mani i kid-s iwwi lliga n Urugway.
Ad yili Swaris ɛad ittfekker-dd wami das-wcin tarxita tazeggʷaɣt di tkuppat n umaḍal, wami issufeɣ s ufus-nnes tcamma, yugi ad yejj Gana ad teɛda ɣer uzgen n umeggaru n tkuppat n umaḍal aseggʷas n 2010, ɛawed wami izɛef Georgio Chiellini di tkuppat n umaḍal aseggʷas n 2014.
Maci ḥa yitri-ya di tseḍma n Urugway i yegguren ad ikemmel tikli-nnes, nzemmer a dd-neydar ula Edinson Cavani, min ɣer yella 35 n useggʷas, d Diego Godin i ɣer yella 36 n useggʷas ɛawed.
Luka Mudrič (Krwatiya)
Itri n Real Madrid, Luka Mudrič, ɣer-s 37 n useggʷas, d ta i ɣa yilin tis tmenya zi tmeccarctin-nnes aked tseḍma n Krwatiya. Ineqqisen qqarnen ila iggur ad isbedd tirart tamaḍlant awerni i tkuppat n umaḍal, waxxa anemhal-nnes iqqar illa iggur ad isiɣa ad yirar ɛad.
Yirar Mudrič ijjen tilalt d tameqqrant maḥend ad issiweḍ taseḍma n tmurt-nnes ɣer umeggaru n umundyal n useggʷas n 2018, illa xesren kunṭra i Fransa.
Iwwi Mudrič x tsemɣurt n tcamma n wureɣ i umirar yifen di tberza, mamec yewwya tasemɣurt n umirar yifen deg umaḍal.
Karim Benzemma (Fransa)
Amirar-a n Real Madrid iggur ad ikemmel aseggʷas-nnes wis xemsa utlatin zegga i ɣa tsala partida tameggarut deg umundyal.
Icerrek Benzemma di tberza-ya zegga yewwya amirar yifen deg umaḍal deg useggʷas n 2022, awerni umi izemmem 44 n ugul zi 46 n partida, waxxa wer izemmem ḥa xemsa n igulen aseggʷas-a.
D ta d twalat tis tnayen i di ɣa icrek deg umundyal awerni 2014. Ssiggʷjen-t x lista n tseḍma n Fransa aseggʷas-a n 2010, zi senni wer yeḥḍir di 2018, zegga i t-ssiggʷjen ca n setta n iseggusa zegga icrek deg ijjen ddusi n aɛeffan.
Gareth Bale (Wilz)
D ta d twalat tameggarut i di ɣa icrek itri n Wilez, Gareth Bale, di tmeggura n tkuppat n umaḍal – tzemmar ad tili ta d tmeggarut-nnes ɛawed.
Yenna umirar-a iwwḍen 33 n useggʷas, ila wer ixes ca ad isbedd tirart-nnes awerni i umundyal n Qaṭar, maca iggur ad yaweḍ 37 n useggʷas di tkuppat n umaḍal i dd-igguren.
Yudef Bale aked tseḍma n Los Angeles Amarikani, deg unebdu i yeɛdan, zegga tsala kunṭra-nnes aked Real Madrid. Nnan ca n ineqqisen ila Bale ttuɣa yegga ad isbedd tirart-nnes tamaḍlant mli taseḍma n Wilz wer tgeɛɛed ca ɣer tkuppat n umaḍal.
Manuel Neuer (Aliman)
yettwaḥsab Itri n Bayern Munich d tseḍma n Uliman, Manuel Neuer ijjen zeg imeḥḍayen n tracca isebḥanen di tsatalt-nnes.
Yewwi Neuer tkuppat n umaḍal aseggas n 2014, ttuɣa-t zeg imiraren isebḥanen.
Iggur ad yaweḍ Neuer 40 n useggʷas deg umundyal n 2026. Setta n ipurtiruten iraren deg umundyal zegga ɛdan lɛumur-a, ula d netta izemmer ad tt-yegg.
Sergio Busquets (Spaniya).
Yettwaḥsab Busquets ijjen zeg imiraren imeqqranen di ɛicrin iseggusa-ya tameggarut, ttuɣa yettɛawan imeddukal-nnes di Barcelona d tseḍma n Spaniya maḥend ad mmutyen ad sugen mani netta ittɣima ɣer deffer ittqarmar tcamma.
Maca lux netta ɣer-s 34 n useggʷas, wer iqqim amec i t-ttuɣa.
Iqqseḥ zi ssa d usawen a nẓer wenn iwwiyen tkuppat n umaḍal aseggʷas n 2010 ad dd-iban twalat-nneɣni deg umundyal, ijjen rebɛa n iseggusa zi lux.
