33.1 C
Nador
Ssebt 13 Yulyu 2024

18 iseggusa n unhezzi n Biyya.. Ayezzim ɛad wer iggenfi

18 iseggusa zeg wami teɛda twaɣit i ttuɣa tɛic Biya llilet n 24 Febrayer 2004, mani dewlen Ibilajen ameknaw Imzuren, Tmasint d Ayt Qamra d ikerkuren. Aya yus-d s ijjen unhezzi n tmurt i yewwḍen 6.5 x sellum n Richter, mani ca n 1000 n yewdan i yemmuten, bla ma a nessiwel x ineyzam d iyujilen.

Γer tseɛɛet n tnayen n ssbeḥ, wami ttuɣa iwdan merra ṭṭsen, di ssbeḥ-nni n tlata, tamurt a tebda a tecḍeḥ, min ijjin ccḍiḥ-a n tmurt di lweqt-a tanita ad yejj aṭṭas n imettinen, ha inni min xef terdel taddart, ha inni min xef tuḍa ca n ḥajet, qqimen nnuɣen.

Midden wer ufin di tseɛɛatin timezwura wi ten ɣa iɣaten, bla ca n tzemmar n yewdan ig inejmen, d ca n tmesmunin d ijemmuɛen n midden i yeggin fus-nnsen ataɣ ad snejmen ca n ijjen niɣ ca n icten ɛad tedder.

Aked ṭṭiya n tfawt, d lḥal infrara, ad banen ibilajen i yeccin aɛmud aṭṭas, Ayt Qamra 203 n midden i g-s immuten, teḍfar-it-id Imzuren s 165 n umettin, Ayt Ɛebḍella s 90 n umettin, Imrabṭen s 107 n umettin, Ayt Yusef Uɛli s 64 n umettin, Rrwaḍi mmuten dag-s 24. Di ledcur a naf 58 immuten deg Ayt Dawd, ma Izemmuren tnayen n iwdan i dag-s immuten.

Lexbar ḥa iwweḍ, anexliɛ d tiggʷdi idla x Biya, ula kṭer aked imettinen i ttuɣa yellan mani mma, d tudrin iredlen, maca di Biyya, wer das-yuqiɛ bu ca n txessura n yewdan, xenni imezdaɣ ruḥen wtin tixuzam.

Iwdan kkin llyali timezwura di berra, lweqt ila d asemmiḍ, d wenẓar ttuɣa yeccat, di lweqt-nni Irifiyen ggin tizemmar d timeqqranin bac ad ssiwḍen tiwizawin i midden waxxa ɣer ledcur i yeggʷjen, mani ca n ijjen iqqseḥ a din yaweḍ alaḥsab ibriden i ttuɣa yellan d uqlilen.

Timaynutin

C.Andic
C.Andic
Chahid Andich

Fser-itt