Aṭṭas zi mani i ttuɣa ggin deg Wamesterdam ad semman ijjen tluggut s yisem n Ḥmed Ziyyani (1954-2016), maca amenɛad i yuglen plaka s yisem-nnes.
Tameslayt-a ibedd x-as umari Arifi-Ahulandi Asis Aynan, i yellan zeg imariten i yettwassnen di Hulanda d berra-nnes. Aynan, ttuɣa yezwar-as di min yeɛdun ibedd x usemmi n ijjen tluggut s yisem n Muḥemmed Caca (1955-2016).
Xelli, ttwaggen isuraf-a di temdint-a tahulandit, mani ttɛicen aṭṭas n Irifiyen, maca tineddam n Arrif ula d icten zzag-sen ma tiweḍ ad tessemɣer s ca n yisem zeg imsawen i yewcin tudert-nnsen i tsekla d yedles Amaziɣ.
Amek nessen ila ismawen n izubaq d leqnaḍer deg Wamesterdam, merra ɛemmren, s uyenni wer qqiment ḥa tiluggutin-a timeẓẓyanin i ɛebbrent tɣezratin n waman zi teccuren tendint-a Tahulandiyt, d manaya i yejjin isem n Zeyyani d Caca uglen ɣer tluggtin-a.
Ḥmed i dd-ilulen deg useggʷas n 1954 di teqbilt n Ayt Sɛid, itleɛ ɣer tmurt n Ulanḍa deg useggʷas n 1979 maḥend ad yirzu x uleqquz n weɣrum. Deg issgusa n 90 ad d-issufeɣ ammud-nnes amezwaru “ad ariɣ deg weẓru”. ad t-isseḍfar s ijjen nniḍen “talewliwet i mulay”. Ad ikemmel s “iɣembab irezzun x wudem-nnsen deg wudem n waman”.
Tiqessisin n Ziyyani ttwaɣennjent zeg waṭṭas n tseḍmiwin n Arrif, mamec ttwaggent tiɣuriwin x-as. Yettwaḥsab Ziyyani zeg wudmawen n tsekla Tarifiyt i ɛemmar-s ad tttwattun niɣ ad nnsefḍen.