Yura-t: Muḥemmed Caca, s weεdal n uselmad Munεim Azegza
Asturjem : Andic
ⵄⴱⴻⵙⵕⴰⵎ ⴰⵛⵁⴱⴰⵔ – ⵎⵓⵃⴻⵏⴷ ⴰ ⴱⴰⴱⴰ Abdeslam achahbar – Mohand a baba / ⵉ ⵄⴰⵡⴷⴰⵙ ⴼⵔⴻⴻⵣⵔⵉ Freezri covers. Tala/YTB
Ilul ɛbdesslam Acehbar deg useggas n 1969, d ijjen artista ɣer-s min ɣa yini, maca lmewt ixeḍef-it jar ifassen-nneɣ di lwesṭ n lebḥer. D netta iggur ɣer “jennet Tandalusit” iqelleε zeg ijjen weftas zi Tiṭṭawin, di llilet-nni tamcumt (04 May 1994). Agellin ila yella deg ijjen lantca akid-s 24 id-sen. Immut uzgen ameqqran-nnsen, nejmen-d zzag-s ɣir rebεa waha.
Qbel ma ad ifekker ad innεreq ɛbdesslam Acehbar iggʷed zzman ad ittu isem-nnes. Iraḥ izemmem ijjen sinta dag-s azgen ameqqran n min iɣennej netta, umi ila iεdel iwalen, llɣa. Iɣennijen-nni nnes n usitem d layas, iɣennijen x teycatin n das-igezzmen wul, mamec ittalleɣ di tilit n bnadem d mani yeggur. Di merra manaya, isnuffer ijjen tmijja tesɣuyyu x lḥal i di ittedder wegdud. Lḥal i yejjin ijjen uḥudri ɣer-s min ɣa yini, d miɣis, yallah mamec irẓem tiṭṭawin x tudert, ad iqemmer s tudert-nnes, d netta ig iɣennjen d tiṭṭawin-nnes x ugeddim nneḍḍen.
Mala walu tudert ataf din laxert
S ijjen tebridt d tamezdagt, wer dag-s la ddenf la walu, bla ma ad isug x Imaziɣen, wer ten-izzim, wer dasen-yenni belli manaya aqqa-t ittwadenna x yiri-nnsen, ixes ad issiweḍ ijjen tebrat belli netta/neccin ɣer-s tasɣart ad y/niri. Ittic asitem i wi illan-nnes ḥuma ad yili d ixef-ines, bla ma ad imsizzel niɣ ad isaqar ci n wemxumbel d neccin wer t-neḥwij.
Wer tteqniḍ ci
Bla ma ad yeksi ca n lxezrat urid d tenni x yimal, wi issnen min ɣa imsaren tiwecca? Isebber ixef-nnes, wer din mana ḥsen zi manaya, Ssber ikessi ijjen lxezrat nneḍni. Zeg umezwaru ibedd deg wudem n leqneḍ. Wul-nnes inneεneε s usitem, ijjen usitem issfaw abrid d lfall n lxir.
Zzuɣar tsilit
Nnufsel zeg iceddan, nhezz, wer weṭṭa ɣer tmurt, qa netta “walu” ɣer-s aṭṭas n wudmawen, ittreddaj tudert n bnadem la zi ɣa daxel la zi berra. Aɣimi wer dag-s bu nnfeε, ittaẓa ittawi-d amelli.
Ugur zzat-sen s uεeffar
Ugur s uεeffar zzat-sen, inni i ɣer-k d-ixezzen s uzgen n tiṭṭ, wer ten-tejja ad zzag-k ɣeḍlen ḥuma ad day-k ggen iceddan, Ttexsen ac-nɣen amen teddared, ac-seffan mala ufin x-ak abrid.
Ini-asen i midden
Ini-asen i yenneḍni, inni issanafen, snεmilen ttun-aneɣ, la xsen la wer xsen, s ca n tebridt niɣ tenneɣni, inni i yexsen ad aneɣ-nḍaren, ixess ad ssnen belli :
Necnin nxes a nili
Neccin nella, nxes a nili, bla “anugisiyar”, maḥend ɣer-neɣ lḥeqq a nili, mux ma tegga tilit-a d mux mma xsen-as ad “tili”. Mux mma yegga lḥal s minzi mma, Wer nxes bu ad aneɣ sefḍen ijjen ijjen, niɣ s kulci. S ijjen wawal d aquḍaḍ, neccin nettxes tudert, nettxes tamurt-nneɣ, wer nzemmer ad nedder bla tanettit-nneɣ.
Kkiɣ x yemrabḍen
Kkiɣ x yemrabḍen, ibedden aked bnadem, aked tmurt, ḥeṭṭan-aneɣ zi mkul tuεeffna, Ssnen min g-s di tmurt-a d min illan x tmurt-a.
Sseqsan-ayi x uraji
Da nettaf zzat-neɣ ijjen lfihem nneḍni, neccin min nessen ila, d yinni ig ittraḥen ɣer wemrabeḍ, d inni ig ittseqsan, ttzawagen, maca ɛbdesslam iqqar-aneɣ-t s mamec nneɣni, Imrabḍen d nitni ig ittseqsan rezzun x temrarut, ttseqsan x uraji, Imrabḍen-a yuẓa ɣer-sen asqar n Imaziɣen, ttrajan ad ggen ca, ad nhezzen.
Mayemmi Imaziɣen?
Ma ssemquddan-aneɣ aked inneɣni ? Niɣ ttezzmen-aneɣ ? niɣ tteggen-t s tnayen.
Wer nettili wer nhekkʷi
Da, izemmer ad yili d azlawi yessiwlen s yisem-nneɣ merra, ula d netta wer yekkis x yiri-nnes manaya, wer dji ittzzem inneḍni waha, ula d Imrabḍen nitni ttseqsan, neεmen ila ttuɣa ttun tamelsayt-a. Anebheḍ-a d useqsi-ya ssarawen-d iseqsan nniḍen wer ttsilin: mayemmi nettraja? Ma manaya iqqen ɣer-neɣ necnin niɣ iqqen ɣer lberrani?
Tili izwar ɣeḍlen-aneɣ ifadden? Wer nettwili min din zzat-neɣ?
Necnin Imaziɣen
Neccin d tarwa n tmurt-a d iẓuran-nnes.
ɛad uka a nili
Rajat, nnehla ma temsizzlem, cḥal ma nekka yeggur a nili, la xsen la kerhen, s uɣil x mkul udiktatur, ad nẓer man wen ɣa iḍeḥken d ameggaru.
A neεdel tibeddiwin
A nsegged abeddi, a nemmuqqel mliḥ, ad negg ijjen lxezrat n lxedmet d upanu, zi senni ad nẓer min ɣa negg surif s usurif
Wer nettqelliq gi tekli
Bla aqelleq, izemmer aqelleq ad yawi ɣer ca n webrid iqqen, izemmer a x-aneɣ iffeɣ, izemmer εawed ad aneɣ-yeɣḍel ifadden
Mala ḍḍuqqzen wajjajen
Anẓar ad yewwet x lɣaci
X ufellaḥ d ubeḥri
Ad ceḍḥen di ddmani
Xmi i d ɣa tas lweqt, timeslayin ad nqelbent, lefraḥet ad teccur ulawen n midden, ad ceḍḥen ifellaḥen d ibeḥriyen, tudert ad tlellec
Ad yecḍeḥ Benneεman
D taɣennant i ulili
Benneεman d neccin/tanettit, alili d yenniḍen/adiktatur
Ad nari awal-nneɣ
Ad d-nerr amezwaru-nni
Ataf ad nari iles-nneɣ, xenni ad dewlen waman ɣer tarya-nnsen.
