Yura-t: Badr Bouskouchi
Adlis n Xalid Lmulaḥid yeffeɣ-dd. Yerr-it ɣer tefransist amari Ayyub Lfelyani. Ɛemmers wer uriɣ ci n wawal x ci n wedlis, xelli ɣriɣ kada. Maca wa, itturs-ayi-t. Minzi ḍefreɣ abrid i yewwi mseqqem, zeg ubeddu ɣar uneggar. Igezzimen i yeksi, tteqqsen-tt i umari qbel i umeɣri.
Lxedmet-a tekssi x weɛrur-ines: awal n ijj n uterras ɣer baba-s. Mala teggamid ad tilid d amari, ad t-iliɣ s lesbab-inek, s tidet, i yixef-inek.
Ayyub yexḍar a das yegg tajmilt i baba-s s tebridt n tsekla. Ḥma ad yedder, ad yessedder baba-s deg-s. Amak tenna Klud Roy: « Tasekla ur tneffeɛ gi walu illa ijj n lḥajet, tsselmad-aneɣ a nedder ».
Mayemmi asturjem n wedlis n Xalid Lmulaḥid rid ḥedd nniḍen? Gg wedlis-ines, Adwal ɣer Tibaza, Albirt Kamu yura: « Deg waduf n tegrest, ukiɣ illa yedder deg-i ijj n unebdu yennufer ».
Ci n yewdan ɛemmars ad ilin deg umkan n yen i yemmuten, maca ttejjan-aneɣ a nelmed a nedder bla zeg-sen. Ayyub, deg ussan ineggura qbel ɣa yemmut baba-s, yessen illa lwacun wer teqqaren i idammen waha, maca qqaren-tt i yen i yettɣiman awarn ma ad yennehdem kulci. Aterras-a ila yella d ameddukel n baba-s, amari Xalid Lmulaḥid. Abeddi-ines yujar qqaɛ iwalen.
Awarn i tɣuri n wungal, Ayyub iwenna ad yesturjem adlis-nni : d ijjt tmuca n umeddukel n baba-s, yegga-as-tt memmi-s.
Necc, ttwaliɣ illa ungal-a d ijj n tidet yesseftuttusen icedditen n yixef. Jun-Pul Sartr yenna: « Neccin, d min nettixḍar ». Maca min ɣa negg mala tudert wer daneɣ-tejji bu a nixḍar ? Amili Nutumb terra-dd : « Timeggit taɛeffant d xmi wer ɣer-k ittili min ɣa tegged ». Amya i das-tura i Farid.
“Imxumbal n Farid” yessawal x temẓi n yijj n uɛezri Farid gi Arif deg iseggusa n 1944-1945, ijj n wakud yeccur s laẓ ineqqen. S lxezrat-ines iḥedqen, ungal yessawal x laẓ d tmesɛit, asetleɛ, leqsuḥiyet n waydud d uḥewwes, d uparder n tmura d yixef. Awarni tarewla-nsen zi ddcar, Farid d lwacun-ines, ad ddren ijj n uhegger d azegrar, yedla s tiggʷdi, tamunit d uweddar. Tanfust-ines tesmuna jer tawengimt yullɣen d tḥajit imunen, yesrusa-dd iseqsan ullɣen x tnettit, lḥeqq d ubeddi n uterras alendad n laẓ d uqabu.
Ungal iteẓẓeg-dd isental x pulitik, tasusyupsykulujit, d tfelsaft. Amari itegg tizemmar maḥend a das-yewc lmeɛna i tudert i yen wer das-yezmiren a tt-ixḍaren, i yen min xef yura : laẓ, qabu d usetleɛ. Deg ijt n tebridt teccur s yemxumbal, taykitin d tidet-ines, Farid yessawal x tmegga-ines, d tggʷdi minzi i taka, d usersi n iseqsan d yemxumbal n weydud ig iheddmen tudert n uterras.
Mala texsem ad tessnem kter x Farid d min xaf-s yekkin, qqareɣ-akum : ɣrem-t.
NB: Qqaɛ min dd-ɣa-yerr wedlis-a xmi ɣa yemmenz, ad iraḥ ɣar tmesmunt n imehlak n (uxenzir) Kanser gi lḥusima.
Adlis ad tafem da : https://ko-fi.com/s/244d3f7e6a