Ij n trezzut temmal belli Uruppa deg-s aṭṭas n ttaḍeyyuɛ n macca: 153 Melyun ṭun n macca i ttett tzubayt mkul aseggʷas, kṭar zi min dd-tessadaf zi berra. Imrezzuten ttettren ad ibeddel uya.
Ṭṭaḍeyyuɛ n macca d ij n x-as aṭṭas n wawal. Zeg ij n jjiht mamek ttmenḍaran leḥwayej minzi yallah isslawen cwayt, zeg uɣeẓḍis nniḍen, di tmura am uliman, mnuɛ ad tjebded macca zeg ibidawen n wefraḍ. Cḥal qaɛ n ṭṭaḍeyyuɛ i yellan, d manaya xef tella tɣuri-ya.
Ij n tɣuri tegga-tt feedbackglobal, tufa belli deg Urupa yettmenḍara kṭar zi min tessadaf zi barra. Manaya ɣer-s later ula x tsebbabt. Mli wer yelli ttaḍeyyuɛ-a, ataf lazma d liɣla n macca wer ittili. I yenna ujurnal n Gardian x tɣuri-ya.
Deg useggʷas n 2021, tessidef-dd Uruppa zi barra ca n 138 melyun ṭun n sselɛet n macca zi barra, anict uya dd-tessidef, yedduri deg wanict ittmenḍaran mkul aseggʷas -153,5 Melyun ṭun.
Later x uklima
ɣir cḥal yettmenḍaran n farina, ad yegg azgen n min teznuza Ukranya i barra, rrbeɛ n min teznuza Uruppa i barra. Amquṭṭes n Ukranya d leḥwej n sselɛet n macca i ɣer-s yeqqnen, immal belli asistim yeccin qabu s ubeddel n uklima, d wussan n corona, ixessa ad ibeddel.
Iwdan ibedden x tɣuri-ya, ssiwlen la x later ittejja ttaḍeyyuɛ-a x uklima, Minzi „afraḍ n macca, ietteg weḥḥdes, setta zi mya n lewsex marra, isekkʷa-yas i Uruppa mkul aseggʷas 143 milyar Uru, ttaḍeyyuɛ n macca, d amnus n ddunyt marra, zi qa igran (Pulitik, tafellaḥt, tasebbabt, amun…), neqqar-as i tmunt n tmura n wuruppa, ad tegg ufuɣ i manaya, ad tessenqes al 50% zi min ittmenḍaran n Macca, x-as al 2030.“
EU ɛad wer dd-tessufeɣ ca n twalat nnumrawat n mecḥal ittmenḍaran n macca deg 2020, S uya, tiɣuri-ya tebna x nnumrawat n weprugram n uklima n UNO. Tɣuri-ya teqqar belli ca n 90 melyun ṭun n min ittmenḍaran, ittraḥ di fabrikat ɣer tzubayt, qbel ad yadef ɣer ssuq, manaya itteg tlata n twalatin kter zi min neṭṭern yewdan zi tudrin.
Tiɣuri-ya teqqar belli ttaḍeyyuɛ-a yewsaɛ di tmura mani rebbḥen yewdan mliḥ, qedden-as i lmaɛica. Kṭer zi tmura di rebbḥen yewdan drust. Tettwala ɛawed belli azgen ameqqran qaɛ wer yudif di leḥsab. Minzi aṭṭas n ittmenḍaran qbel ad dd-yaweḍ fabrikat, di tfellaḥt. Qeyyuɛi waha, qqaren belli 20% n min tettsennaɛ EU, ittraḥ deg wefraḍ mkul aseggʷas