![](https://tifray.com/wp-content/aggaj/1debb432d5.jpg)
Tenna lḥukuma di Tunes belli teṭṭef kṭer zi 600 n midden awerni rebɛa n llyali n iɣuyyan. Ca n iḥudriyen njemɛen di lwest n temdint n Tunes bdan ttcarran Ipulisen s weẓru. Imeggura-ya rrin-d s lmaynat n lgaz d iqudas n waman. Aṭṭas n iḥudriyen di Tunes wer ɣer-sen lxedmet.
Aya ittas-d awerni ɛecra n iseggusa zegga Itunsiyen ila ttɣilen s tegrawla-nni ggin ad ibeddel lḥal-nnsen saɛa ufin lḥal-nnsen ikeffes ula kṭer zeg uɣezdis ademsan. Imseksiten-a jar Iḥudriyen d lmexzen Atunsi yewweḍ tineddam ameknaw Lgesrin, Susa, Gefsa d Lmunestir.
Ijjen umessiwel s yisem n tewzirt n dixel Tatunsit yenna belli azgen ameqqran n yinni ittwaṭṭfen d iḥudriyen ɛad wer bliɣen. Merra idsen ttuɣa tteggen lexdayem n warddaj n wagla azayez. Irni inna ila tnayen n Ipulisen nnyezmen.
Iɛawed-d iwekked « Manaya wer lli ɣer-s tɣuni aked ca n umussu n tmeskanin umi ddustur ittic-as lḥeqq, ḥaca timeskanin ttuqiɛent s uzil bla ma ad reddjen ca n wagla n ddewla ». Azgen ameqqran n tmeskanin-a tina msarent n imukan yettwassen dag-sen ẓẓelḍ.
Suniya, icten zi tenni ig isɣuyyun tenna « Marra wen ig isɣuyyun qqaren x-as d aceffar. Ha aqqa-aneɣ neccin nus-d s uzil s wudem-nneɣ ittwassen ḥuma ad asen-nini nxes lexdayem.. Nxes timmuzɣa-nneɣ ».
Tademsa n Tunes yecca aṭṭas n teyyita di ɛecra n iseggusa imeggura, tus-d Kuruna tkemmel x-as.