Ijjen wemsagar yettwagg di ssandika n wamun Ameɣrabi n lxedmet UMT di Ddriwec. Maḥend ad ssiwlen x ubelleɛ n Spiṭar di Ddriwec. Waxxa lehlak n Kuruna ileqqef aṭṭas n yewdan di jjihet-a tanita.
Timesmunin d ssandikat i yemsagarent nnant belli ixess ad « ssemɣarent s wezday jar-asent ». Ad jjent Amsagar-nni «irẓem deg wudem n merra timesmunin timeɣnasin ». Timesmunin kksent deg umezwar-nni ad sekkent ijjen tebrat i tawzirt n seḥḥet d tewzirt n daxel. Aked uɣezdis n ca n isuraf-nniḍen iggur ad ten-ggen.
Timesmunin d ssandikat d inhezziten i yellan deg wemsagar-a ttrent maḥend ad tili tamunt d lxedmet icerken maḥend ad reẓmen sspiṭar n Ddriwec deɣya. Ad kksen cwayt n usufrar x imezdaɣ n Ddriwec.
Amec nessen belli spiṭar n Driwec yalleh tteggen dag-s baquna n Covid-19, maca inni ihelken sekkan-ten ɣer Spiṭar n Lḥasani di Nnaḍur.
Zeg ijen uɣezdis-nniḍen ila izwar tenna tamesmunt tameɣrabit n tseqqar n yewdan di Nnaḍur, deg ijjen tebrat-nnes; “aqa arendad i weqqan n twura n spiṭar n Ddriwec, d weqqan n imeẓẓuɣen x ilaɣiten n imezdaɣ d tmesmunin, nesfekkara-kenniw s taqsuḥi d lxaṭar n mani yeggur manaya, nettetter zeg-wem amur nniḍen bac ad treẓmem deɣya spiṭar n Ddriwec, bac ad yemmeksi cwayt umeḥḥen i ittekken x imezdaɣ, ad yefses ɛawed ddḥas i yellan x spiṭar n Nnaḍur”.