May ɣa tekked a mmi?
Qqim a dak-iliɣ
Di mani cekk-dd-jjiɣ.
Berra d anu yesmeḍ
Ikessin am walliɣ…
Merra d aḍu yekmeḍ,
Ifessin am wassiɣ![1]
Qqim a dak-iniɣ…
Tudert teḍsa[2] tegnu,
Am min gnuɣ ɛdiɣ…
Tumert teḍra ternu,
Am min rnuɣ zdiɣ!
Cekk a dak-ssettun
Tudert mig dduriɣ!
Nekk a day-sseddun[3]
Tumert[4] mix nnuriɣ!
Uka tusut n wemrus
S uferreg, ad aliɣ!
Ula turut n wekrus
S uḥerreg, ad agiɣ!
wadem-ayi a yemma,
Mala wer cemm-ẓriɣ..
Fad ur day-ittijji,
Azil a da t-rniɣ.
Necc telɛeɣ a yemma,
Ɣer yewdan ad iliɣ..
Ɣer mani tibridin
Ur kessint ɣar usmiɣ[5]!
Telɛeɣ a x-am rzuɣ,
Di tudert mix tt-cciɣ..
Ma aɣrum, necc, zi zik,
Ur xaf-s dinn seqsiɣ..
Aqa di tmurt-inu
Taremmuẓt ur tt-ksiɣ !
Ɣir aceffay-inem
Netta waha i swiɣ!
I necc mux das-ɣa-geɣ,
Ad rniɣ ur weṭṭiɣ ?
Ag wi day-iɣeṭṭlen
Mala jjiɣ… niɣ kkiɣ…?!
I necc mux das-ɣa-geɣ
Ad rniɣ ur beṭṭiɣ..
Ag wi d ay ikerrfen,
Mala ggiɣ… niɣ rriɣ…?!
I necc mux das-ɣa-geɣ
Ad rniɣ ur qeṭṭiɣ
Ag wi day-iseffḍen
Mala lliɣ… niɣ nniɣ…?!
Tamagit[6] min teɛna
Mala nettat tessiɣ,
Uka a day-tejj ɣufiɣ?!
Qa tamurt d ijj ucal,
Mani ma ad mlawiɣ..
Ma tawurt d ijj udal[9]
Mani ma ad mtawiɣ!
Gi tudert ksiɣ-cemm
D aẓri minzi ttwaliɣ..
Di tumert lsiɣ-cemm
D aẓli minzi ttwagiɣ..
Teffɣed kid-i d imal
Waxxa necc deɣya sxiɣ
Teffred kid-i d iman
Waxxa necc deɣya xsiɣ!
Cemm yellan d ism-inu
D cemm waha i ggiɣ…
Cemm yellan d ixf-inu
D cemm waha i lliɣ..
Cemm yellan d ils-inu
D cemm waha i sliɣ..
Cemm yellan d ilm-inu
D cemm waha i lsiɣ!
Necc ffɣeɣ a yemma
Ɣer yewdan ad iliɣ..
Ɣer mani tibridin
Ur kessint ɣar usmiɣ!
Sifaw Lhanis
————————-
Amawal-inu:
[1] Assiɣ: min ittejjan ci ad yaɣ niɣ ad yeṭṭar gi ci, niɣ ad yefsi gi ci uka ad yejj deg-s limert.
[2] Teḍsa: teḍḥek.
[3] Sseddun: ssuguren, srewḥen.
[4] Tumert : lefraḥet.
[5] Asmiɣ: tusemɣa.
[6] Tamagit: tiɣuni n wefgan ɣer wegraw n yewdan mig t-tesmun tmurt d yiles d tussna d tɣerma i dasen-itticcen anagraw anamun.
[7] Anfafad: virus.
[8] Tanettit: tiɣuni n kra (afgan, tamurt, tameslayt…) ɣer yexf-ines, neqqar s umedya “tamagit tamaziɣt” i “unagraw ig ismunan tinettitin tinakalin (tanettit tarifit, tanettit tasusit… atg)”.
[9] adal : aɣemmus.