16.1 C
Nador
Jjemɛa 12 Yebril 2024

Min ɛnan rebɛa-nni n yergazen islamiyen i isugen x Musku?

Amen kmummcen, ijjen zzag-sen iqqim x ijjen karrusa, nettwala ila dag-sen tiyyita x wudmawen-nnsen. D yina d rebɛa-nni n yergazen i tesbedd Arrusiya, tcekk dag-sen ila d nitni i yenɣin 193 n imettinen deg ijjen sala ggin dag-s kunsirtu n rruk.

Ina, tettaham-iten Arrusiya ila d nitni i yeggin timegga-nni n ubersiggʷed.

Di jjemɛa i yeɛdan, ca n yergazen s lesnaḥ, udfen-d x ijjen nnutil di temdint n Crocus di Krasnogorsk, i yellan x tmewwa n ẓelmeḍ n Musku, uca bdan ttiran x lɣaci. Ca n 6 000 n yewdan i ttuɣa yeḥḍaren di kunsirtu-nni n rruk.

Ibersiggʷaden-a, umi ḍelqen aqerṭas, teṭṭef timessi di tzeqqa, uca tessehwa-tt-id.

Bla imettinen, yeḥseb lmexzen arusi ila yufa kṭer zi 100 n ineyzam.

Taseḍma n Ddewla tameslemt, niɣ DAƐIC, nnan-d belli asugi-ya ittwadenna x yiri-nnsen, maca lmexzen arusi yenna ila ddegg-a n wawal “wer zzag-s walu”.

Aseɛdi-nnsen ɣer lmeḥkama

Arrayes arusi Vladimir Poutine, yenna di twalat tamezwarut deg wass n letnayen i yeɛdan ila d “islamiyen iradikaliyen” d yinni i ttuɣa yellan ɣer deffer i usugi-ya, maca yenna ɛawed ila aya ittadef deg ijjen lḥerket n uhuddi i tettegg Ukraniya.

Tanafut tafidiralit n laman tarusit (FSB) tessken-d ila tesbedd rebɛa n yergazen di jjihet n Briansk, i yeggʷjen s ca n 400 KM x yeffus-uɣelluy n Musku, awerni i 14 n tseɛɛatin n usugi.

Ɛdan irgazen-a x lmeḥkama, lḥedd i yeɛdan, ukzen irusiyen min ɛnan, ufin belli d Dalerdzhon Mirzoyev, Saidakrami Murodali Rachabalizoda, Shamsidin Fariduni d Muhammadsobir Fayzov

Ɛlaḥsab xinsiya n tɣemsa tamaddudt tarusit Tass, nitni qqarsen-d zi Tadjikistan, ijjen tmurt i yellan x ẓelmeḍ n Afɣanistan.

Deg ijjen usiweḍ i tegga lmeḥkama x Telegram, wekkden ila Mirzoyev “yenɛem ila yegga tamenɣiwt-nni”; ula d d Rachabalizoda yenɛem.

Rebɛa-ya n yergazen ad qqimen ttwaḥebbsen kudkud ar 22 mai mala walu, i d-terni lmeḥkama.

Sebɛa-nniḍen sbedden-ten di Arrusiya, cekken dag-sen ila ula d nitni cerken deg usugi.

Izumal n teyyita d uweddeb

Deg ijjen ubidyu, nzemmer a nẓer ipulisen, s lmask x wudem, weyyin imirditen-nni ɣer lmeḥkama n Basmanny, di tmenẓawt n Arrusiya.

Umi udfen ɣer lmeḥkama, ila qqimen deg ijjen texxamt tbelleɛ, ɛessen x-asen ipulisen s ijjen wudem yedla.

X ifuṭuten, nzemmer a nettwala izumal n teyyita x wudem n inekraf.

Ittban-d uweddeb x wudem n inni isugen x kunsirtu-nni.

Amessiwel s yisem n Kremlin, umi qqaren Dmitri Peskov, yugi ad issiwel x manaya di tinawt n tɣemsa i yegga di letnayen i yeɛdan.

Irgazen-nni i ttuɣa yellan di lmeḥkama, zeɛma Mirzoyec d Rachabalizoda, ttuɣa bberknent tiṭṭawin-nnsen, d umeẓẓuɣ n ijjen zzag-sen ggin-as binda, minzi qessen-as ijjen ucwiḥ zeg umejjun-nnes zegga i t-sbedden.

Ḥaca, Mirzoyec, ittban-d axmi ɣer-s ijjen ssak n plastik iqqers x yiri-nnes.

Udem n wergaz-nni umi qqaren Fariduni, ttuɣa yuff; mani wenniḍen umi qqaren Fayzov, ittban-d axmi yesxef wami i t-wwin ɣer lmeḥkama, ssirḍen-as ijjen tebluzt n spiṭar.

Tenna Reuters ila traḥ-as ijjen tiṭṭ.

Ɛad din lankiṭ

Daɛic, d nettat i yeggin x yiri-nnes asugi-ya, di jjemɛa i yeɛdan x kanal-nnes di Telegram, ifser abidyu i d-immalen ibersiggʷaden-nni tiran x lɣaci s uqerṭas di sala n kunsirtu.

Zeg uɣezdis-nnes, yenna Peskov, ila maḥend lankiṭ ɛad aqqa-tt din, wer iɛeddel a nessiwel x manaya luxa.

Maca lmexzen yenna ila bḥal walu Ukraniya tɛawen ibersiggʷaden-a. Yenna Poutine belli qa Kiev tessujed “ijjen tburjet” maḥend ad ẓwan fruntira, ad rewlen ɣer tmurt tukranit.

Yenker arrayes Ukrani Volodymyr Zelensky ddegg-a turdayin, ijjen zeg yergazen n lɛesker ukrani, yenna belli qa d “tibbuhlya” mala a neḥseb irgazen-nni ẓwan fruntira i yeccuren s lamynat, dag-s luluf n iɛeskriyen irusiyen, maḥend a ten-nessenjem neccin.

Maca Adrienne Watson, amessiwel s yisem n laman n Marikan, yenna belli qa d Daɛic i yellan ɣer deffer i usugi-ya. Wer din ula d ijjen ufus d Ukrani.

Arrusiya vs Daɛic

Marikan ila teɛlem i Musku di beddu n cher-a ila qa izemmer ad yili ca n usugi kunṭra i Arrusiya, asugi-ya ad ineyyec x ijemmuɛen imeqqranen. Zi senni, tefser Marikan ijjen weɛlam i yewdan merra n tmurt.

Aɛlam-a tḥesb-it Kremlin am ijjen prupaɣanda, xsen ad zzag-s adfen deg istayen i ttuɣa yettwaggen di Arusiya.

Tenna Washington belli wer ɣer-s ca mayemmi i ɣa tcekk di min teqqar Daɛic.

Maci d ta d twalat tamezwarut i di d-tettsuga Daɛic x Arrusiya d tizi-nnes di berra.

Ad nessmekti ila taseḍma-ya, tdenna x yiri-nnes aḍuqqeẓ n ijjen ṭeyyara d tarusit s nnej i Maser deg useggʷas n 2015 i yeksin ca n 224 n yewdan, azgen ameqqran-nnsen d irusiyen. Mamec i ggin x yiri-nnsen aḍuqqeẓ n ijjen mitru deg useggʷas n 2017 di Saint-Pétersbourg, mmuten dag-s ca n 15 n yewdan.

Inesfayen qqaren belli taseḍma txes ad tneyyec x Arrusiya, minzi ɣer-s ijjen tilalt d tameqqrant deg ureddel n Daɛic di Suriya minzi amek yettwassen ila Arrusiya ttuɣa tettɛawan aked Baccar Al Asad.

Ɛawed ɛlaḥsan tnayen n imenɣan i tegga Musku di Ccican, jar useggʷas n 1994 d 2009, rni ɣer-s wami tegga Musku fus-nnes deg uḥewwes n Afɣanistan deg wakud n Isuviyatiyen.

Taseḍma n ISIS-K txeddem deg wafɣanistan d ca n imukan n Wasiya tanammast i yellan d ijjen isem d aqdim n jjihet-a tanitani.

D ijjen tseḍma txeddem mliḥ d nettat ibedden awerni i iḍuqqiẓen i ttuɣa yellan deg uzaggʷez n Kabul, wami teffeɣ Marikan deg useggʷas n 2021.

*S wumlayen n Graeme Baker d Robert Greenall i BBC MUNDO

Timaynutin

C.Andic
C.Andic
Chahid Andich

Fser-itt