Din ijjen useqsi d ameqqran i d-nesrusa, ma nzemmer ad nari « tadimuqraṭit » niɣ « tadimukraṭit » ?
Ixess-aneɣ a nessen beɛda d amezwaru, tatimulujit n ukunsipt-a, amek nessen ila iqqars-d zi tegrikt taqdimt demokratía, awal-a d uddis; dag-s tnayen n wawalen, amezwaru d « dêmos » ixes ad yini agdud/aɣref d «kratos » ixes ad yini « tazmert, jjehd ».
Xmi nxezzer di mamec i das-neqqar i wawal-a s Tmaziɣt, nettaf din tnayen n yebriden, Iqbayliyen ɣer-sen manaya :
Démocratie : tugdut, Démocratique: amagday, Démocrate : amagdu. (xzer amawal azefran i d-issufeɣ asqamu Unnig n Timmuzɣa, 2013). Maca deg umawal n usinag ageldan n tussna Tamaziɣt ggin-as « tadimuqṛaṭit », mamec i das-ggin ɛawed i ‘démocrate’ niɣ ‘démocratique’ : « adimuqṛaṭi ».
Ttwaliɣ wer ɣer-s bu lmeɛna ad d-nawi ijjen wawal zi Tmaziɣt maḥend a nessiwel x ijjen ukunispt d agraɣlan, yettwassen deg wezgen ameqqran n tutlayin n umaḍal s demokratía, x min d-nniɣ s nnej, aqqa-ayi aked usinag deg westay i yegga i ukunsipt-a. Maca, wer fhimeɣ ca mayemmi asinag yexḍar ad t-yari s /q/ deg wemkan n /k/ i yellan deg wawal anesli manis i t-id-nugem.
Xmi nxezzer deg wezgen ameqqran n tutlatyin i yettarin isem-a nettaf ttarin-t s /k/ maci s /q/, ad d-nawi s umedya ilsawen-a: Taturkit: demokrasi, tafarisit: دموکراسی, takurdit: demokrasî, takrwaṭit: demokracija… Iwa aseqsi ameqqran, min ijjin imesnilsen n usinag ageldan n tussna tamaziɣt, urin awal-a s /q/ deg wemkan ma ad t-arin s /k/ am merra ilsawen n umaḍal?
Samḥet-ayi, nniɣ « merra ilsawen n umaḍal», maca xḍiɣ, kkset ḥa taɛrabt zi leḥsab, i yettarin awal-a ammu : « dimu:qra:ṭi:yah ديموقراطية ».
Ittawi-ayi-d rebbi ila imessnilsen n Tmaziɣt deg usinag ttemsurrufen aked teɛrabt axmi d weltma-tsen tamenzut, ttweqqren-tt, teggen s leḥsab-nnes, ttemcawaren akid-s di min di mma, waxxa xmi ttexsen ad d-ssidfen ca n wawal d jjdid ɣer Tmaziɣt, ixess ad d-yekk x teɛrabt d amezwaru, maci x yelsawen igriku-latiniyen i di d-ilul wawal-a, yemɣer dag-s.
Ittban umxelweḍ-a mliḥ, mala nekker nbedd mliḥ x tnayen-a n imeknawen :
- technique => atiqni
- technologie => tatiknulujit
Mala nrezzu x umsasa n yiles, ixess tnayen-a n iwalen ad ten-nari s tnayen idsen ma s /k/ niɣ s /q/, maca di Tmaziɣt, newwi-d ɣer-neɣ ijjen wemxumbel ila yella di teɛrabt aṭṭas zi mani.
Minzi iwalen i d-yekkin zi tegrikt zik, am di lɛahed aɛebbasi mani ttuɣa asturjem ɛlajjehd zi tegrikt ɣer teɛrabt, ttuɣa iturjmanen ttmeyyalen ḥuma ad ssidfen asekkil n /q/ deg iwalen i di yella asekkil n /k/. S ijjen umedya iban; awal n “chemia” ttuɣa ttarin-t s teɛrabt taqdimt s “qimiya” maca lexxu ttarin-t s “kimiya”, din imedyaten-nniḍen ameknaw awal n “Aristokratía” ttarin-t “aristuqraṭiya”, d wawal n “Technē” i yella ttarin-tt “tiqni”.
Ḥaca iwalen i d-sɛarrben amenɛad, ttejjan-asen asekkil n /k/ amenni, bla ma ad t-erren ɣer /q/, amedya i newca s nennj netta d “technologie” i yella qqaren-as “tiknulujiya” lebda s teɛrabt.
Luxa neccin nefhem mliḥ beṭṭu deg usexdem n /q/ d /k/ di teɛrabt, maca yettɣima aseqsi ameqqran, mayemmi neccin ixess-aneɣ a nesselseq ixef-nneɣ ɣer usatal min xef tekka teɛrabt? Mayemmi wer nettsijji x lxedmet n tutlayt taɛibrit i yeggin deg yiger-a? D ijjen useqsi-nneḍni, malla aɛraben d imselmen deg ijjen wakud ggin tizemmar-nnsen deg usturjem zi tegrikt nican, mayemmi wer nettegg ula d neccin lxedmet-nni nican, ad neɛdel iwalen-nneɣ imaynuten zi mamec i ten-d-nugem nican?
Wa d abrid innurẓem i trezzut.