Ass n 31 Dujenber: ttmunant twacunin, tiraren cwirti, sduqquẓen bunaḍur, sqarquben lkisan n sarbisa niɣ d campanya. Maca dduniyt wer ttidef marra deg useggʷas amaynu deg ijjen wass. din wi gi itizwaren, din wi ityuran. Maca mkul tamurt d arcuq nnes. d manaya i xef ɣa nekk aneɛdu deg artikel‑a
![](https://tifray.com/wp-content/aggaj/8569179904.jpg)
Silvester d ijjen wawar yewsaɛ di tmura n irumiyyen, tteggen‑t la d isem i yḥenjiren. Isem yekka‑dd zeg awal alatini “Silva” ixes ad yini lɣabet. Selvister ittawid lmeɛna n “Bnadem n lɣabet” niɣ wenni yeqqnen ɣa lɣabet. Maca mayemmi das qqren legnus n irumiyyen i wass‑a ammu?
Manis idd‑yekka Silvester?
Fyicta n yixf n useggʷas ttedwal ɣer lweqt n arrumanut. 153 qbel i ɛissa, ttuɣa teggen‑as nnacat i beddu n useggʷas. Maca di lweqt nni ttuɣa ixf n useggʷas mkul 10 n iyuren. Ar mani d 1582 i yebda leḥsab zeg ass n 24 dujenbir ar ass n lmut n lqiss Silvester amzgaru. 31 Dujenber n useggʷas 335. Senni yebda leḥsab n wass amzwar deg useggʷas agrigi. i ɣer ḥessben azgen ameqran n legnus. Silbester yedwel d aneccet n uḥlallad deg ixf n useggʷas.
Ijirmanen la d nitni ggin ccef ṭṭaḥ.
Deg akuḍ amrwassu, ttuɣa teggen fyicta i wbeddel n useggʷas. Ijirmanen (Germans) ttuɣa teggen fyicta ḥima ad stelɛen jnun iɛeffanen n wussan ibarcanen. suya ttuɣa teggen timessi: Aṭṭas n sdaɛ, d tjararin n ukeccud areqqent. Dellqen‑asent ad nnḍent ad hwant deg iɣẓar. Wer das‑ufin mamek waha, ma d nitnin ixarrsen d amzwar di ccefcaf.
Di leɛwayed yeqqnen ɛawd ɣa useggʷas amaynu agriki, ssitimen i mkul ijjen amutti yecna deg useggʷas n jdid. Asitem‑a yekked zeg udayen “Rosch”. Nitnin qaren‑as Rosch Haschanah
![](https://tifray.com/wp-content/aggaj/de61ecfb57.jpg)
Ammu das teggen‑t legnus.
Waxxa Silvester yekka dduniyt amn tekmel, s imasiḥiyyin d yenni wer yellin d imasiḥiyin. Maca din timura wer teggent ca fyicta ass nni. Imaziɣen, Ccinwa, Thailand, Munguli d Iran, ɣer‑sen ussan nniḍen. wer ḍfren ca asggʷas agriki.
Ustraliya d Nyuziland minzi tagʷej xaf‑neɣ aṭṭas, ittadef‑dd xaf‑s useggʷas zic, ttili ɣer‑neɣ ɛad d azgen n wass. (ittawi 26 n tseɛɛatin ḥima ad yadef useggʷas x marra tamurt), iḍeffer‑iten Jjappun d Afɣanistan, Arrusya, ɛad Uruppa d tqiccit n tefriqt. Imirikanyyen zeg ineggura
![](https://tifray.com/wp-content/aggaj/6dd59b87bc.jpg)
Deg Uruppa msebḍan
Fyicta n Silvester mkul lgens mamek das itegg. Ihulandiyyen teggen ak lwacun nsen mayn umi qqren nitnin “Oudejaarsavond”. Tetten ca n pastili qaren‑as “Oliebollen” (yegga am ssefnej d ttibulatin) sduqquẓen caf‑s ijjen uṭermu n uceffay, ccaten‑t akd tmurt ad yegg lḥess. Inemsawiyyen ceṭṭeḥen al lwest n llilt, uca ssiɣan i ccefcaf.
![](https://tifray.com/wp-content/aggaj/341cca24a6.jpg)
Wadday n Uruppa am Aṭalyan: qqaren‑as ass n uqarsu azeggʷaɣ. Ttwalan iqarsuten (slippat) izeggʷaɣen deg ass nni ittawi‑dd sseɛd. awarni 12 n djiret, tetten leɛḍes. Ifransisen teggen “Le Réveillon de Saint-Sylvestre”, Ccampanya, d tqemmumin. d tenni d lɛada nsen. Iseppunya tetten ict tḥebbuct n uḍil n binu mkul ma yewta unina n glizya di Madrid, 12 n tḥebba s kulci. ɣer uneggar sessen xaf‑s ijjen lkas n binu. Lkas nni ttili ndern dag‑s ijjen txademt n wureɣ. Dd tawi sseɛd. Ca n ipurtugaliyyen, tettfen ijjen uru € deg ufus, zeɛma sfadjan zzag‑as arrzeq.
Di sennej n tmurt, d ijjen dduniyt nniḍen.
Imukan mani ssawalen taglanzit, tɣennjen “Auld Lang Syne“. Skutland tekken tlata n wussan nitni d fyicta. Sessen ijjen tsessi nsen qaren‑as “Hot Pint” texdem s wiski, sarbisa, d tmellalin.
Idanimarkyyen arrcuq‑nsen ɛawd weḥdes. Yarḍen i tḥenjirin d ḥenjiren dticucay xaf‑sen tadeḥḥakt. Tareẓẓan leqcuɛ. Arrusya teksi aṭṭas n nnacat n lmulud n ɛida, ɣa Silvester, Smuttyen la d iwarditen ukrismas ɣer nhar n 31 dujenbir.
![](https://tifray.com/wp-content/aggaj/bc12aff593.jpg)
I barra i Wruppa?
Filippin iḥenjiren nsen neggzen deg ujenna ar mani zemmren ad awḍen, ad xaf‑sen yadef useggʷas deg ujenna. Brazil yarrḍen marra tuccemlelt, ssemlan zzag‑s tazdugi, d wafra. Maca arruḍ n daxel d aqerqac. Awraɣ ittawi‑dd agla, Azegza n layas, Aḥmaymi ittawi‑dd ssbar.
Arginitina i das ifehmen, ɣerrsen deg wass‑a marra rekwaɣeḍ wer ineffɛen. Neṭṭaren‑ten zi lekwaẓa.Ekwadur teccuren imunikuten s bunaḍur, teccɛen‑asen ad dduqẓen. Ca n ttwalatin imunikuten n yewdan iḥekkmen, niɣ n yewdan n upulitik
![](https://tifray.com/wp-content/aggaj/1d67044ca0.jpg)