Vyinna/AFP – Iwekked ijjen uneqqis ittwafser ass-a n lexmis, ila azgen n Imselmen izeddɣen di tmura n Tmunt tawruppawit nnan-d ila tteggen x-asen lferz di tudert-nnsen takuyast, s uzemmem n “tmerniwt d tameqqrant di lekruhhiyt” awerni i usugi n Ḥamas x Israyil di Kṭuber 2023,
Amec i d-yenna ijjen wemssiwel s yisem n tesnurayt n Tmunt tawruppit n tseqqar timezwura Nikul Ruman i France Presse, ila ɛlaḥsab data i d-innegrun “ittraḥ itteqsiḥ ḥma ad tilid d ameslem di Tmunt tawruppit.”
Deg uɣezdis-a, wekkden ca n wezgen n imselmen ila ufin lferz di tudert-nnsen takuyast, aya deg ijjen usundaj i di icerken ca n 9600 n yewdan jer Kṭuber 2021 ar Kṭuber 2022 di 13 n tmura Tmunt tawruppit s umquddi aked 39 di miyya i yettwazemmemn di tɣuri tameggarut i yettwaggen deg useggʷas n 2016.
Immel-d Ruman ila zeg wami i yemsar usugi x umussu n tnezbayt tameslemt Ḥamas, x yeffus n ddewla taɛibrit di 27 Kṭuber 2023, d uḍuqqeẓ n umseksi deg ugemmaḍ n Ɣezza, tettwazemmem “ijjen tmerniwt d tameqqrant di lekruhiyyet n imselmen” i yettemɣaren s umenɣi-ya i yellan di ccerq n lwesṭ.
Di tɣuri-ya i yettwaggen, nettaf ila deg uswir n lferz kuntra i yemselmen, yettwazemmem asɣal ameqqran di Nnemsa (71 di miyya), teḍfer-itt Aliman s 68 di miyya, aked uyenni tzemmem Fransa asɣal n 39 di miyya mani lferz i yudrusen qqaɛ ttuɣa-t di Spaniya, d Sswid.
Tenna-d tɣuri-ya ila lferz ameqqran iban-d s waṭṭas di ssuq n lxedmet d trezzut x tzeddiɣt i yerrḍen funara, drus cwayt x yergazen d tinni i wer yerrḍent ca funara.
Terni tessefru-d tɣuri-ya ila “wer ttneyycen ca x imselmen x ddin-nnsen waha, maca ula x ukulur n tilemt-nnsen d iẓuran-nnsen, d s minzi nitni d imetlaɛ.”
Twessa tasnurayt-a, adu tfawt n tnaṭṭufin-a i “itteggent amnus”, Tamunt tawruppawit ḥma ad telha aked lferz kuntra i imselmen. Tettwala tnessixeft n tesnurayt Sirpa Rocio ila min irennin deg ufinumin-a “inaw n tikkest zi temedanit i nẓerr di tmenẓawt amen tekmel.”
Tteggen imselmen taseḍma tadinit tis tnayen di Tmunt tawruppawit, ttakkʷaḍen ɣer ca n 26 melyun n imezdaɣ ɛlaḥsab ijjen ustatistik n wammas n Biyu i yettwaggen deg useggʷas n 2026, ittsemma ca n xemsa di miyya zeg imezdaɣ n tmunt-a i di tella 27 n tmurt.
Yenna uneqqis ila nnumru n imselmen “immerni s waṭṭas deg iseggusa imeggura, s usrag n inni d d-irewlen zeg imseksiten n Afganistan, Lɛiraq d Suriya.”