Ass-a (20 yulyuz), teɛda tlata n yissggʷusa x tecli i ɣer ilaɣa Naser Zzefzafi qbel ma ad yettwaṭṭef, ticli n 20 yulyuz, i ttuɣa ggin yimeɣnas n Lḥirak maḥend a zzag-s ssemɣaren zeg wektay n Wenwal.
Di facebook, Irifiyen ttarin, ttzemmamen tungimt-nnsen, mayen ẓrin d mayen x-asen yekkin di tecli-ya tanita.
Ijjen zeg yinni icerken di tecli-ya, iɛawed x mamec i dd-yusa zi Nnaḍur ɣer Biyya d mayen yeẓra deg webrid. Ijjen nniḍen, ibḍa ca n yibidyuten d ttsawar ttuɣa aqqa-ten ɣer-s x Facebook.
Ticli-ya tanita i di cerken luluf n yewdan i dd-yusin zi manis mma. Usin-dd maḥend ad bedden aked lḥirak n Arrif, d maḥend ad snufslen inecraf n Arrif.