Ittwaṭṭef tameddit n jjemεa n 24 Cutenbir i yeεdan, ameɣnas d usuḥufi « Brahim Buxizzu » ɣer Ijaḍarmiyen n Miḍar. Ttuɣa rzun-dd x-as netta d bab n usit « Nadorpress » Musṭafa Acbal ḥuma ad asen-slen alaḥsab ijj n ubidyu i yettunuḍen di Social Media.
Nniyaba n Lmeḥkama n listinaf di Nnaḍur; ttuɣa tewca iwarditen-nnes bac ad dd-laɣan i « Musṭafa Acbal » d « Brahim Buxizzu » alaḥsab abidyu-nni. I di dd-ittban Buxizzu ittekritika ca n Ijaḍarmiyen i ttuɣa iḍeffaren i Ayt Ṭiyyeb.
Alaḥsab min din inna usit n « Nadorpress » ila nniyaba teqqar ila « Buxizzu » ixes ad igg tiεenkraf i tecli x webrid ameqqran. Netta ttuɣa jjin-tt ɣer-sen di Miḍar, mani i das-dd-rxun i « Acbal ».
Zeg ijjen uɣezdis-nniḍen, aṭṭas n imeɣnas wer dasen-iεjib bu lḥal wami ṭṭfen Buxizzu. Ula kṭer di lweqt-a mani abirus n Kuruna yella s waṭṭas. Imeɣnas-a s ixef-nnsen i ibedden zzat i uraq n Ijaḍarmiyen di Miḍar; nnan ila mala qqimen ṭṭfen Buxizzu iggur ad sɣuyyen wami dewlent tseqqar d tlelliyin ɣer deffer.
Aked manaya; tamesmunt Tameɣrabit i tseqqar n yewdan (AMDH) di Miḍar tegga ijjen usiweḍ teεlem-dd dag-s uḍuf n umeɣnas n unhezzi n Tmaziɣt « Brahim Buxizzu ». Mamec iruḥen ɣer Ijaḍarmiyen bac ad t-ẓren dinni. AMDH tenna-dd ila « tettraja ad tessen ttuham i das-wcin i wemɣnas Buxizzu; mamec netta ittbedda akid-s d merra imeɣnas n tmesmunt n Buya deg Ayt Tiyyeb.
